Экологиялық мәдениет – өркениет белгісі

5 маусым – Дүниежүзілік қоршаған ортаны қорғау және Эколог күніне орай Астанада «ҚТЖ-Жүк тасымалы» ЖШС Еңбек қауіпсіздігі және еңбекті қорғау, экология департаментінің ұйымдастыруымен дөңгелек үстел өтті.  

Жалпы серіктестіктің барлық 13 филиалында «Климаттың өзгеруінің теміржол инфрақұрылымына әсері» тақырыбында экологиялық қауіпсіздік мәселелеріне арналған дөңгелек үстелдер өткізіліп, қоршаған ортаны қорғау, экологиялық бастамаларды іске асыру және әрбір қызметкердің табиғи ресурстарды сақтау және климаттың өзгеруінің әсері үшін жауапкершілігін арттыру мәселелері талқыланды. Сонымен қатар «Таза Қазақстан» акциясы аясында филиалдар табиғатты қорғау іс-шараларының кешенін ұйымдастырды. Мысалы, 1500-ден астам қызметкер қатысқан «Автокөліксіз күн» және «Пластиксіз күн» акцияларын айтуға болады.  

Өскелең ұрпақтың назарын экология мәселелеріне аудару үшін «Табиғатты сақта» тақырыбында балалардың сурет байқауы ұйымдастырылып, оған серіктестік қызметкерлерінің 50-ден астам баласы қатысты. Әкімшілік ғимараттар мен өндірістік бөлімшелерде үй-жайларды көгалдандыру бойынша акциялар өткізіліп, 250-ден астам жаңа өсімдіктер қойылды. Филиалдарда 1800-ден астам қызметкердің қатысуымен сенбіліктер ұйымдастырылып, 45 тоннаға жуық тұрмыстық және өндірістік қоқыс шығарылып, іргелес аумақтар тазартылды.  

Осынау іс-шараларға белсенді қатысқан серіктестіктің Ақмола, Павлодар, Қарағанды, Жамбыл, Қызылорда филиалдары ерекше атап өтілді. Бұл іс-шаралар серіктестіктің экологиялық саясатының маңызды бөлігіне айналды және қызметкерлердің қоршаған ортаны сақтау мен қоғамда экологиялық мәдениетті қалыптастыруға бағытталған әлеуметтік жауапкершілігінің жоғары деңгейін көрсетті.  

Астанада өткен жиында ҚТЖ-ның барлық өңірлердегі эколог мамандарымен бейнеконференция арқылы байланыс орнатылып, «ҚТЖ-Жүк тасымалы» ЖШС бас инженері Марлен Көкірекбаев сөз сөйледі. Ол биыл бұл күн әлем бойынша «Климаттың өзгеруімен күрес және қоршаған ортаға теріс әсерді азайту» деп аталып отырғанын жеткізді.  

– Біздің серіктестік ірі жүк тасымалдаушы ретінде зиянды қалдықтарды азайту, табиғи ресурстарды ұтымды пайдалану және өндірістік процестердің энергия тиімділігін арттыру жөніндегі іс-шараларды дәйекті түрде іске асырады. ҚТЖ-да төмен көміртекті даму тұжырымдамасын және корпоративтік экологиялық саясатты іске асыру шеңберінде әрбір бес жыл сайын энергия үнемдеу және энергия тиімділігін арттыру жөніндегі жоспарлар әзірленеді және іске асырылады. 2020-2024 жылдарға арналған Жоспарды орындау қорытындысы бойынша серіктестікте 160 іс-шара іске асырылды, бұл энергетикалық ресурстарды тұтынуды 5,5% немесе 6 мың тоннадан астам шартты отынды қысқартуға мүмкіндік берді, ал экономикалық тиімділік 59,6 млн теңгені құрады, – деді бас инженер.  

Қазіргі уақытта серіктестік нысандарында сұйық және қатты отынмен жұмыс істейтін 44 электр қазандығы, 10 газ қазандығы және 23 қазандық пайдаланылуда. Төмен көміртекті даму саясатын іске асыру шеңберінде компания жылумен жабдықтау объектілерін электр энергиясына ауыстыру бойынша жоспарлы жұмысты жалғастыруда. Бұл тәсіл ластаушы заттар мен парниктік газдар шығарындыларын едәуір азайтуға, өндірістік объектілердің энергетикалық тиімділігін арттыруға және компания мен ҚТЖ-ның экологиялық мақсаттарына қол жеткізуге қосымша үлес қосуға мүмкіндік береді. Қазіргі уақытта бағдарламаның 2025-2029 жылдарға арналған келесі кезеңі іске асырылуда, оған 93 іс-шара кіреді. Күтілетін нәтиже – энергетикалық ресурстарды тұтынуды 511 мың тоннадан астам шартты отынға төмендету және экономикалық тиімділікті алу шамамен 39,8 млрд теңге.