Кабул дәлізінің құрылысы қақтығыстарға қарамастан жүргізіледі
Өңірдегі геосаяси шиеленістерге қарамастан, Орталық және Оңтүстік Азияны байланыстыратын ауқымды логистикалық жобалар қарқынды түрде жалғасуда. Өзбекстан, Ауғанстан және Пәкістан тараптары «Термез — Харлачи» (Кабул дәлізі) теміржолының техникалық-экономикалық негіздемесін дайындау үшін бірлескен экспедицияға кірісті. Көлік дәлізі Кабул мен Исламабад шекарасындағы жағдайдың ушығуына қарамастан салынып жатыр, деп хабарлайды Rail-news.kz.
Маңызды учаске қайта жанданды. Балх провинциясында «Хайратон — Мазари-Шариф» жолының соңғы нүктесінде жұмыстар қайта басталды. Айта кетсек, бұл бағыт бойынша 2011 жылдан бері 50 миллион тоннадан астам жүк тасымалданған.
«Найбабад» станциясында 1 шақырымдық кірме жол төселіп бітті. Алда тағы 1,65 шақырымдық желі мен заманауи қоймалар құрылысы күтіп тұр.
Мамандардың болжамы бойынша, Трансауған магистралі іске қосылғанда жылына 22–34 миллион тоннаға дейін жүк өткізе алады. Бұл теңіз маршруттарына тиімді балама болып, Оңтүстік Азияға жүк жеткізу уақытын 3 есеге қысқартады.
Жоба аясында Өзбекстан тарапы Қазақстаннан келетін транзиттің бір бөлігін Қарақалпақстандағы «Оазис» пунктіне қарай бағыттауды ұсынып отыр.
Бұл қадам қазіргі уақытта шамадан тыс жүктелген «Сарыағаш – Келес» шекара өткелін едәуір жеңілдетуге және өңіраралық тасымал жылдамдығын бірнеше есе арттыруға мүмкіндік береді.