Сапалы жол – қауіпсіздік кепілі

«ҚТЖ» ҰК» АҚ филиалы – Шымкент магистральдық желі бөлімшесінде теміржол инфрақұрылымын жаңғырту және сауықтыру бойынша кешенді жұмыстар жүйелі түрде жалғасуда. Биылғы жылы негізгі бағыттардың бірі саналатын Арыс – Сарыағаш учаскесінде ауқымды жұмыс көлемі атқарылды.

Күрделі жол жөндеу жұмыстары Шеңгелді – Жылға, Жылға – Дарбаза, Монтайтас – Шағыр аралықтарында, сондай-ақ Жылға, Дарбаза және Шағыр станцияларында жүргізілді. Күрделі жөндеумен қамтылған жолдың жалпы ұзындығы 36,2 км құрап отыр.  

Шымкент магистральдық желі бөлімшесі директорының орынбасары Жомарт Мырзабековтің мәліметінше, бүгінде рельс-шпал торын ауыстыру, балласт қабатын тазарту және жаңарту, жолды түзету мен тұрақтандыру бойынша негізгі жұмыстар толық аяқталған. Қазір жолды белгіленген нормативтік талаптарға толық сәйкестендіру және пойыздардың қауіпсіз әрі үздіксіз қозғалысын қамтамасыз ету мақсатындағы қорытынды технологиялық жұмыстар жүргізілуде.  

Сонымен қатар Арыс – Түркістан учаскесіндегі Қарақоңыр – Қостүйін аралығында ұзындығы 8,07 км болатын жолға күрделі жөндеу жұмыстары жүргізіліп, бұл жоба аталған учаскедегі инфрақұрылым сенімділігін арттырып, жолдың техникалық жағдайын жақсартуға мүмкіндік бермек. Ал қозғалыс көлемі төмен Шымкент – Ленгер учаскесінде бес станциялық жолға күшейтілген орташа жөндеу жүргізіліп, оның көлемі 5,8 км құрады. Атқарылған жұмыстар жолдың жоғарғы құрылымының қызмет ету мерзімін ұзартуға, пойыздар қозғалысының жайлылығын арттыруға және қозғалыс қауіпсіздігін қамтамасыз етуге бағытталған. Сондай-ақ Арыс-1 станциясындағы «Д» және «Е» парктерін дамыту жұмыстары ерекше маңызға ие. Бұл жоба учаскенің өткізу және өңдеу қабілетін одан әрі арттыруға мүмкіндік береді. Жоба аясында ұзындығы 3,4 км болатын үш жолға күшейтілген орташа жөндеу жүргізіліп, 19 жаңа бағыттама бұрмасы төселген.  

Бағыттауыштарды жаңарту жұмыстарына да айрықша көңіл бөлінуде. Биыл Шымкент жол дистанциясының басты жолдарына 5 жаңа бағыттама бұрмасы, ал Арыс жол дистанциясына 16 жаңа бағыттама бұрмасы төселді. Сонымен қатар жаңасына ауыстырылған ескі бағыттама бұрмалары қайта қалпына келтіріліп, станциялық және қабылдап-жөнелту жолдарында қайта пайдаланылуда. Осы жұмыстар аясында Шымкент жол дистанциясында 5, Арыс жол дистанциясында 6 ескі жарамды бағыттама бұрма қайта төселді. Мұндай тәсіл станциялық инфрақұрылымды кезеңкезеңімен жаңартуға, жол шаруашылығының техникалық жағдайын жақсартуға және қосымша материалдық шығындарды барынша азайта отырып, жолдардың қауіпсіз әрі тұрақты пайдаланылуын қамтамасыз етуге мүмкіндік бермек.  

– Жүргізіліп жатқан жұмыстар өңірдің теміржол инфрақұрылымын дамыту мен жаңғыртуға бағытталған жүйелі бағдарламаның бір бөлігі болып табылады. Жолдар мен бағыттауыш бұрмалар шаруашылығын дәйекті түрде жаңарту магистральдің пайдалану сенімділігін арттырып, тасымалдау үдерісінің тұрақтылығын қамтамасыз етуге және пойыз қозғалысы үшін қауіпсіз жағдай жасауға ықпал етеді, – деп түйіндеді сөзін бөлімше директорының орынбасары.