ҚТЖ Дарбаза – Мақтаарал теміржол желісінің құрылысын жеделдетеді
«Қазақстан темір жолы» ҰК» АҚ еліміздің негізгі инфрақұрылымдық жобаларының бірі Дарбаза – Мақтаарал жаңа теміржол желісінің құрылысын жалғастыруда, деп хабарлайды Rail-news.kz.
Бүгінгі таңда нысанда 57 км негізгі және станциялық жолдар төселген. Құрылысқа 1200 астам маман жұмылдырылса, олардың көпшілігі Түркістан облысының тұрғындары. Жұмыстар 800 бірліктен астам арнайы техниканы пайдалана отырып жүргізілуде.
Сонымен қатар Мақтаарал шекара маңы станциясының құрылысы жалғасуда. Мұнда шекара және кеден қызметтерінің, сондай-ақ басқа да мемлекеттік бақылау органдарының жұмысы үшін қажетті инфрақұрылым құрылады.
ҚТЖ кадрларды даярлауға ерекше көңіл бөліп келеді. Компания филиалдары басшыларына Мақтаарал, Сарыағаш және Жетісай аудандарының жергілікті атқарушы органдарымен және жұмыспен қамту орталықтарымен бірлесіп теміржол инфрақұрылымы объектілерінде одан әрі жұмыс істеу үшін жергілікті тұрғындарды оқыту мен жұмысқа орналастыруды жандандыру тапсырылды.
Жаңа желі іске қосылғаннан кейін 400 жуық тұрақты жұмыс орны құрылады.
Жаңа теміржол желісі Мақтаарал және Жетісай аудандарының ҚТЖ негізгі желісімен тікелей байланысын қамтамасыз етеді. Бұл Сарыағаш шекара станциясына жүктемені шамамен 40% төмендетуге, «Солтүстік – Оңтүстік» халықаралық көлік дәлізінің тиімділігін арттыруға және Қазақстанның оңтүстігіндегі экономиканы, бизнесті және логистиканы дамыту үшін қосымша мүмкіндіктер жасауға жол ашады.