Тиімділігі зор жоба
Маңғыстау вагон пайдалану депосының экипировка бойынша бригадирі Асқар Жанадбаев ерекше рационализаторлық жоба ұсынды.
Жолаушылар пойыздарындағы төменгі сөрелердегі бекіткіш газ пружиналардың қақпағын ойластырған ол ұсынысын арнайы комиссия алдында қорғап та үлгерген. Жобаның экономикалық тиімділігі 3 миллион теңгеден асып жығылады.
Жоба авторының пайымынша, Крюков вагон құрастыру зауытынан шыққан жолаушылар вагондарының төменгі сөрелерінде газ пружиналарының қалпағы пайдалану кезінде жиі істен шығып қалады екен.
«Пластмасса материалдан жасалғандықтан одан әрі пайдалануға жарамай қалады. Жөндеуге де келмейді. Мұндай қалпақшалар бөлек шығарылмайды. Сондықтан, вагон пайдалану депосының қызметкерлері басқа амалын іздеген», – дейді Ақтөбе магистральдық желі бөлімшесіне қарасты ғылыми-техникалық ақпарат орталығының басшысы Майра Өмірзақова.
Олқылықтың орнын толтыру мақсатында теміржолшылар газ пружиналарды токарлық станоктарда диаметрі 33 мм дөңгелек болаттан жасауға болатынына көз жеткізген. Бұл рационализаторлық жоба қалпақшаларды алмастыру арқылы жаңасын жасап, шығындарды азайтуға мүмкіндік береді.
Бекбол Құлдан