Кешенді техника көмегімен
Күніне жүздеген, мыңдаған тонна жүк тиеген вагондар зулап өтіп жататын теміртабанды жолдың да тозатыны ақиқат. Сондықтан теміржолшылар оның сапасына көз жеткізіп, уақытылы сауықтырып отырады.
Жамбыл жол дистанциясы директорының орынбасары Нұрмахан Қалиевпен Аспара-Шу арасын жалғайтын қос рельстің бойындағы қауырт шаруа барысында кездестік. Жұмыстың көрігін қыздырып жатқан соңғы заманауи техникалар – австриялық кешенді машиналар тізбегі. Маңдай терін жеңімен сүрте әңгімесін бастаған дистанция өкілі алдымен әлгі техникалармен таныстыра жөнелді.
– Мынау ПБР деген шағыл тас төсейтін техниканың кереметі сол, шпалдардың арасына қажетті тастарды өзі реттеп, жайып отырады. Ал ДГС – төмендеп кеткен жолды көтеріп, ұрғылап, қайта қалпына келтіретін ғажап техника. Бұлардан бөлек, 200 метрлік, 500 метрлік рельстерді дәнекерлеп, жалғау қызметін атқаратын ПРСМ техникамыз тағы бар. Бұл кешенді техникалар Шу механикаландырылған жол дистанциясына тиесілі екенін айта кеткенім жөн. Австриялық кешенді жол машиналары арнайы кесте бойынша жылына бірнеше рет темір жолдарды сауықтырып отырады. Яғни, бұрын біздің жүз жолшының жаз бойы жасайтын жұмысын бір сәтте жасап өтеді, осылай бірте-бірте баяғыдай жолшылардың ауыр қол еңбегі техникаға ауысып жатыр, – дейді Нұрмахан Құралбайұлы.
Күзгі дайындық жұмыстарына тартылған алты адамнан тұратын бригада колонна жұмысымен қабаттаса жол бойында жүр.
Дистанция директоры орынбасарының айтуынша, күзгі дайындық шараларының аясында бұл жолы отыз шақырымдық рельстің жағдайына бақылау жасалады. Ал осы аралықтағы темір жолмен күніне орта есеппен 70-80 пойыз өтеді, жаз маусымында олардың саны тіпті жүзден асып жығылатын көрінеді. Олардың арасында жолаушыларды тасымалдайтын «Тұлпар-Тальго» жүрдек пойыздары да бар. Сондықтан жол шаруашылығының сапасы сын тудырмайтындай болуы шарт.
– Алда әлі жоспар көп. Жақында бұрандаларды ауыстырмақпыз. Одан кейін қыркүйек айында ЛуговойҚорағаты аралығындағы темір жол бойына ағымдағы жөндеу жұмыстарын жүргіземіз, біздің жақта жаймашуақ жылы болып ұзақ тұратын күз айлары оған толық мүмкіндік береді, – дейді Нұрмахан Құралбайұлы.
Бірінің соңынан бірі ілесіп қос рельстің үстінде жылжып келе жатқан машиналар тізбегінің жұмысын үйлестіріп жүрген колонна бастығы Қамсейіт Құрмановтың мақсаты – кешенді техниканың сапалы жұмысын қамтамасыз ету.