Көпір салуды жоспарлап отыр

Шымкент жүк тасымалы бөлімшесі аумағында 9 айдың ішінде 13 адамды пойыз басып кету оқиғасы тіркелген. Оның ішінде 8 жағдай станция аралықтарындағы магистральдық жолдарда, ал 2 жағдай станция аумағында орын алған.

Бөлімшеде бөгде адамдар мен ірі қара малдың теміржол аумағына шығып кетуінің алдын алу мақсатында жұмыстар үздіксіз жүріп жатыр. Атап айтқанда, ӘТЖК, ЖІІБ қызметкерлерімен бірігіп жыл басынан бері 257 рейд ұйымдастырылып, халықпен түсіндіру жұмыстары жүргізілген. Сонымен қатар, 116 тәртіп бұзушылық анықталып, 3788 теңге айыппұл салынған.

Бұдан бөлек, теміржол аумағына жақын орналасқан жергілікті халықпен 9274 жиын өткізіліп, 5005 адам қамтылған. Жалпы білім беретін мектептерде 146 түсіндіру жұмысы өткізіліп, шараға 12184 оқушы қатысыпты. Оқушыларға теміржолдан қалай өту тәртібі көрсетілген жадынама және бейнероликтер таратылған. Бұқаралық ақпарат құралдарында теміржол аумағында қауіпсіздік шараларын сақтау ережелері бойынша телеарнада – 6, газетте 22 материал жарық көріпті. Сонымен қатар, бөлімше мамандары теміржолды халық көп кесіп өтетін жерлерде жаяу жүргіншілерге арналған көпірлер салу туралы мәселе қозғап, қалалық әкімшілікке ұсынысхат жіберді. Аталған көпірдің құрылысы 20192020 жылдарға арналған жоспарлы-сметалық құжаттарына енгізілгені туралы жауапхат та келген. Көпірді 3293 км 5 пикетте және 3297 км 10 пикетте салу жоспарланып отырған көрінеді.

«ҚТЖ-ЖТ» АҚ «Шымкент ЖТ бөлімшесі» филиалының бас инженері Әбілқасым Айдаровтың айтуынша, адам басу жағдайларының барлығы дерлік азаматтардың өз өмірі мен қауіпсіздігін сақтамауының салдарынан болып отыр. «Өйткені, адамдар теміржол қауіпті аймақ екенін біле тұра өтуге тыйым салынған жерлерден «өте салғанды» ыңғайлы көреді. Арнайы көрсетілген жерге дейін барып өтуге ерінеді не асығыстық танытады. Сондай-ақ жол шетіндегі қоршауларды да ұрлау тыйылмай тұр. Ол аздай, өңірде мал иелерінің жауапкершілігі өте төмен, қараусыз жайылып жүрген малдың салдарынан да қозғалыс қауіпсіздігіне үлкен зиян келуде», – дейді бас инженер.