Көліктік бақылау комитеті темір жолға қарасты 300-ге жуық нысандағы заңбұзушылықтарды анықтады
«Қазақстан теміржолшысы» газетінің тілшісі
ҚР Индустрия және инфрақұрылымдық даму министрлігі Көліктік бақылау комитеті темір жолдағы 299 кәсіпорынға тексеру жүргізіп, бірталай заңбұзушылықты анықтаған. Көліктегі сыбайлас жемқорлық құқық бұзушылықтардың алдын алу бойынша жүргізілген тексеру нәтижесінде 8,6 мың жылжымалы темір жол құрамы, 7,2 мың шақырымнан астам магистральдық, станциялық және кірме жолдар тексерілген. Бұл туралы көлік бақылау органдарының 2021 жылдың 9 айындағы қызметінің қорытындыларын жариялау бойынша кеңес кезінде айтылды. Вице-министр Берік Камалиевтің басшылығымен өткен кеңесте 4,5 мың жүк көлігінің жол жүруге рұқсат етілген параметрлерден асып кетуіне жол берілмегені айтылды. Жалпы жол төсеміне келтірілген залал 1,4 трлн теңгені құрап, мемлекет кірісіне 4,3 млрд теңгеден астам алымдар мен айыппұлдар өндірілген. Айта кетейік, соңғы кезде кірме жолдар сапасы сын көтермейтіні жайлы теміржолшылар дабыл қағуда. Жеке меншік иелерінің қарауындағы кірме жолдардағы бұзушылықтар, жылдар бойы жөндеу көрмеген темір жолдар тиісті орындардың да алаңдаушылығын туғызуда.