Теміржолдағы машинажасау саласы бойынша Қазақстан-Швейцария бірлескен кәсіпорыны құрылуы мүмкін

Алдағы уақытта елімізде қазақстандық-швейцарлық жаңа кәсіпорын пайда болып, теміржол машинажасау саласында жұмысын бастайды деген сенім бар. Бірлескен өндірісті іске қосуға екі елдің бизнес өкілдері Мемлекет басшысы Қасым-Жомарт Тоқаевтың Швейцарияға ресми жұмыс сапары барысында уағдаласты. «Кездесуде Мемлекет басшылары Қасым-Жомарт Тоқаев пен Ги Пармелан шағын және кеңейтілген форматта жүздесіп, әңгімелесулер өткізді», деп хабарлайды Президенттің баспасөз қызметі. ҚР Президенті елімізде жүзеге асырылып жатқан саяси және экономикалық реформалар туралы әңгімелеп, Ынтымақтастық перспективалары туралы сөз қозғаған. Тоқаев Конфедерацияны Еуропадағы маңызды саяси және экономикалық әріптес ретінде қарастыра отырып, Қазақстан-Швейцария қатынастарын дамытуға ерекше мән беретінін атап өтті. Соңғы 15 жыл ішінде еліміздің экономикасына 26 миллиард швейцарлық франк салынса, Швейцарияға салынған қазақстандық инвестициялар көлемі 775 миллионнан асқан. Ал өткен жылы екі ел арасында миллиардтан астам долларға сауда жасалған. Сауда-саттықты дамытуға әлеует бар екенін алға тартқан тараптар ынтымақтастықты нығайтуға келісті. Бұған жаңа үкіметаралық және коммерциялық келісімдер дәлел болмақ. Мәселен, Қазақстанның машина жасаушылар одағы «АMMANN» компаниясымен ынтымақтастық туралы Меморандумға қол қойды. Қазақстанның машина жасаушылар одағының басшысы Мейрам Пішембаев бірлескен қызметтің негізгі бағыттары Қазақстанның машина жасау саласына инвестициялар тарту екенін атап өтті.

«Бұл тығыз коммерциялық байланыстарды дамытуға негіз болып, екі ел арасындағы инвестициялар мен сауда айналымын арттырады. AMMAN – жол-құрылыс техникасы нарығындағы аса ірі компания. Бұл Қазақстанның дамып келе жатқан транзиттік әлеуеті үшін өте маңызды», – деді ол. Қазақстан нарығына кіріп отырған екінші компания – Stadler. Ол жолаушылар вагондарын өндірудің әлемдік көшбасшысы болып табылады. «Stadler компаниясымен бірлесе отырып, жолаушылар вагондарын шығару бізге құзыреттер алуға, инвестициялар және жаңа технологиялар тартуға мүмкіндік береді. Сонымен қатар локализациялау өндірісінің өрісі кеңейеді», – дейді Мейрам Пішембаев.