ҚР Парламенті Мәжілісінің Депутаты атыраулық теміржолшылармен кездесті
Атырау облысы бойынша меншікті тілші
Атырау жүк тасымалы бөлімшесінде ҚР Парламенті мәжілісінің депутаты Дүйсенбай Тұрғанов теміржолшылармен кездесті. Ол Қаңтар оқиғасы, соған орай берілген Президент тапсырмасын орындау міндеттері, депутаттық корпустың қазіргі жұмысы жөнінде баяндады.
Күнде келе бермейтін депутатқа теміржолшылар көкейде жүрген сұрақтарын да қойды. «Темір жол – қауіпті аймақ, жұмысы қиын сала. Мұнда дала төсінде, жел өтінде жүріп, күні-түні үздіксіз жұмыс атқарылады. Соған орай теміржолшылардың зейнет жасын төмендету тетіктері қарастырылса» деп сауал тастады теміржолшы Б.Өтеулин. Депутат кейбір мамандықтарға болмаса, оған әзірге үкімет тарапынан қарастырылып жатқан жеңілдік жоқ екенін жеткізді.
Атырау-Астрахань тас жолы жөнінде қойылған сауалға ол 2023 жылы бітетінін, Доссор-Құлсары жолын 4 жолақты қылу жоспары барын, ал Мұқыр-Құлсары тас жолының мәселесі шешілмей тұрғанын айтты. Атырау өңірін экологиялық апатты аймаққа жатқызуды заңдастыру бойынша сұраққа оның заңды механизмдерін зерделеуге қажетті ойын білдірді.