Елімізде коронавирус індетімен байланысты эпидахуал жақсарғандықтан биыл жаз маусымында Алакөл демалыс аймағына баратындар саны көбейгелі тұр. Осыған орай демалыс орнына жетуде теміржол көлігін пайдаланатындардың басым болатыны белгілі. Кеше «ҚТЖ» ҰК» АҚ мен еншілес ұйымдары және қазақстандық туристік операторлар, жеке тасымалдаушылар, бірқатар облыс әкімдіктері мен министрліктер өкілдері бейнеконференция арқылы бас қосып, осы мәселені талқылады.
Ұлттық компанияның басқарма төрағасының орынбасары Қанат Әлмағамбетов төрағалық еткен бейнеконференция барысында Алакөлге жетудегі мәселелер мен оның ҚТЖ тарапынан шешілу жолдары сөз болды.
– Маусым айының ортасына таман Алакөл демалыс аймағына баратындар саны күрт өсіп, теміржол көлігіне сұраныс артады. Осы бағытта біздің тарапымыздан қандай жұмыстар атқарылып жатқанына тоқталып өтейін. Биылғы жаз маусымына әзірге жоспарлап отырғанымыз – өткен жылы қолданыста болған 11 бағдарды қалдыру, сұранысқа қарай әр құрамда 19 вагонға дейін болуын қарастырамыз. Ал егер сұраныс тым көбейер болса, тағы 1-2 пойыз шығарылуы мүмкін. Өткен жылғы тәжірибе көрсеткендей, курортты маусымның бірінші кезеңінде Алакөл бағытына пойыздарда орын жетіспеушілігі туындаған. Ал тамыздан бастап, керісінше, Алакөлден бері қарай орын тапшы болған. Сондықтан биылғы маусымға ертерек дайындық жүргізу үшін сәуір айында бас қосуды жөн көрдік, ұсыныс-пікірлеріңізді тыңдап, сол бойынша жұмыстар жүргіземіз, – деді Қ.Әлмағамбетов.
Бейнеконференцияға қосылған туристік агенттіктер өкілдері Алакөлге баратын пойыздардың сапасына, осы бағыттағы пойыздардың жүру кестесіне және тариф бағасына қатысты сұрақтары мен ұсыныстарын айтты.
– Әрине, бұл бағытта су жаңа вагондар болады деп уәде бермесек те, вагондарда жолаушылар жайлылығы үшін барлық жағдай жасалады, мәселен, ауа тартқыш желдету жүйесі заманауи түрімен ауыстырылады, басқа да сервистік қызметтер жақсартылады. «Тальго» пойыздарын іске қосуға қатысты ҚТЖ құрамдарды дайындауда, мамыр айында ол дайын болады. Ал оларды субсидиялауға қатысты Алматы облысы әкімдігінің шешімдері маңызды болып отыр, – деп қосты басқарма төрағасының орынбасары.
