Биыл транскаспий бағдары арқылы тасымалданатын жүк легі екі есе артпақ
«Қазақстан темір жолшысы» газетінің тілшісі
Мемлекет басшысының Түркияға сапары аясында көлік саласында да бірқатар уағдаластықтарға қол жеткізілді. Анкара қаласында «ҚТЖ» ҰК» АҚ Басқарма төрағасы Нұрлан Сауранбаевтың төрағалығымен «Транскаспий халықаралық көлік бағдары» Халықаралық қауымдастығы Жалпы жиынының (Middle sorridor) мәжілісі өтті, деп хабарлайды Rail-news.kz.
Жиынға қатысушылар қауымдастықтың өткен, 2021 жылғы есебін тыңдап, Транскаспий халықаралық көлік бағдарын (ТХКБ) дамыту стратегиясын, тасымал тетіктерін, маркетингтік жоспарды және 2022 жылға арналған тарифтік саясатты талқылады. Биыл контейнерлік тасымал өткен жылға қарағанда екі есе көбейіп, 50 мың ЖФЭ дейін жетеді деп жоспарланып отыр. Сонымен қатар жалпы тасымал алты есеге – 3,2 млн тоннаға дейін артады деген болжам бар.
Айта кету керек, биылдың өзінде, яғни 2022 жылдың 4 айында ТХКБ бағыты бойынша 733 мың тонна жүк тасымалданған. Бұл – 5 мыңнан астам вагон ары-бері өтіп, 10 мың ЖФЭ контейнерлерді діттеген жеріне жеткізді деген сөз. Іс-шара қорытындысы бойынша ТХКБ бағытымен жүк легі ұлғайып жатқандықтан үздіксіз тасымалдауды бәсеңдетпеу мәселесі келісілді.
Транскаспий халықаралық көлік бағыты Қытай, Қазақстан, Каспий теңізі акваториясы, Әзірбайжан, Грузия, Түркия және Қара теңіз арқылы Еуропа елдеріне өтеді. "ТХКБ" қауымдастығына 20 компания мүшелікке кірсе, оның ішінде теміржол әкімшіліктері, порттар, 8 елдің кеме қатынасы және логистикалық компаниялар бар.