Жол жөндеуші – жаңа нарықта

Жаңалықтар

14.02.2017, 11:32

Белградта қазақстандық «Компания «Жол жөндеуші» ЖШС темір жол желілерінің құрылысымен және күрделі жөндеу жұмыстарымен айналысатын сербиялық кәсіпорын «ZGOP»-ты сатып алу келісімшартына қол қойды. Өткен жылдың желтоқсанында Қазақстан Республикасының Президенті Н.Ә.Назарбаевтың Сербия Республикасының президенті Т.Николичпен және сол елдің премьер-министрі А.Вучичпен Қазақстан мен Сербия арасындағы инвестициялық ынтымақтастықты дамыту бойынша келіссөздер нәтижесінде қол жеткізілген келісімдерді жүзеге асыру аясында «Компания «Жол жөндеуші» ЖШС сербтің «ZGOP» компаниясын сатып алып отыр. Жуырда Сербия экономикасы министрлігінде аталған ведомство басшысы Г.Кнежевичтің, сондай-ақ, келісімнің ресми қатысушылары «Жол жөндеуші» ЖШС мен «ZGOP» компаниясы өкілдерінің қатысуымен келісімшартқа қол қойылып, «Компания «Жол жөндеуші» ЖШС атынан бас директор Хурам Мурадов қатысқан. Бұл келісімшарт Қазақстан мен Сербия арасындағы сауда-экономикалық байланысқа пәрмен беруімен қатар екі ел арасындағы ынтымақтастықтың жалғасы болмақ. Атап өтерлігі, екі ел арасында толықтай жүзеге асыруды қажет ететін, өзара тиімді қарым-қатынастың үлкен әлеуеті бар деп танылуда. Өз кезегінде, қазақстандық компания дамудың жаңа жолын ашуда. Аталған компанияны сатып алуға Австрия, Ресей, ҚХР, Франция және Түркия елдерінің компаниялары қызығушылық танытыпты. Бұл компанияға неге қызығуышылық танытты дейтін болсақ, Сербия халықаралық кредит алыпты, соның ішінде, өз темір жолдарын қайта құрылымдауға Еуропалық қайта құрылымдау және даму банкінен несие алған екен. Ал сербиялықтарды «Компания «Жол жөндеуші» ЖШС-ның жұмыс істеген жылдары ішінде құрылыс саласында табысты да әсерлі жетістіктерге, еңселі бедел-абыройға қол жеткізгені, сондай-ақ, серіктестер мен қызметке тапсырыс берушілердің құрметі мен сеніміне ие болуы қызықтырса керек. Мұнымен қатар, қазақстандық компания автомобиль жолдарын қайта құрылымдау және салу бойынша қызметтер көрсетіп, көліктік-логистикалық кешеннің инфрақұрылымдық жобаларын жүзеге асыруға, солардың қатарында ұшу-қону жолақтары құрылысы мен теңіз порттарын дамытуға қатысып келеді. Халықаралық сапа стандарттарына сәйкес жұмыс істеп келе жатқан компания Ресей, Таяу Шығыс және Еуропа нарықтарында өзіне жаңа перспективалар ашып отыр. Бүгінде компанияда 1500-ден астам маман жұмыс істейді, олардың қатарында жобаларды басқару бойынша халықаралық сертификаттары бар, жоғары білікті мамандар мен инженерлер бар.

Жол жөндеуші – жаңа нарықта

Басқа да жаңалықтар

«Қазақстан теміржолшысы» газеті, №56 05 шілде 2024 жыл