Мәселе – жауапкершілікті арттыруда

Жаңалықтар

14.02.2017, 12:05

Қауіпсіздік шаралар жоғары деңгейде ұйымдастырылғанымен, темір жол бойындағы елдің жауапсыздығынан төрт түліктің жолға шығып кетіп, өзін-өзі өлімге қиған жандардың суицидке баруы – қозғалыс қауіпсіздігіне кері әсерін тигізуде. Мәселе экономикалық шығында емес, мәселе – жауапкершілікті арттыруда болып отыр. Осы мақсатта ЖТ Жамбыл бөлімшесінің өкілдері көліктік прокуратура, Жамбыл станциясындағы желілік ішкі істер бөлімі, Әскерилендірілген теміржол күзеті және өзге де жауапты мекеме қызметкерлерінің басын қосып, жоғарыдағы мәселені шешу жолдарын қарастырды. Ұзатылған жылы бекітілген жоспарға сәйкес Әскерилендірілген темір жол күзеті, Желілік ішкі істер бөлімі және жол бөлімшесі қызметкерлерімен барлығы 114 рейд жүргізіліп, болат жолдың бойында бекітілмеген жол өткелінен өтпекші болған 67 бөтен тұлға анықталыпты. Оларға 105 585 теңге көлемінде айыппұл салынған. Жалпы, өткен жылы болат жолдың бойында адам және мал басудың 24 дерегі тіркелген. Мал басудан 16 оқиға, ал адам басудан 8 оқиға орын алған. Жамбыл магистральдық желі бөлімшесі жол бөлімінің басшысы Ғалымбек Батырбеков әр сала мамандары өз ісіне аса үлкен жауапкершілікпен қарайтын болса, қайғылы оқиғалардың алдын алуға болатындығын алға тартты. «Егер талдайтын болсақ, аймақтағы Хантау, Бурылбайтал, Жуантөбе, Шығанақ, Ақшолақ, Жиделі, Бірлік-1, Бәйшешек, Аспара, Малдыбай, Мойынты, Шешенқара, Тәтті телімдерінде мал басы жолға жиі шығады. Жоғарыдағы мал басу оқиғалары да осы телімдерде орын алып отыр. Әрине, біздің тарапымыздан жергілікті әкімдік өкілдерімен тығыз жұмыс жүргізіліп жатыр. Алайда, мал пойыздың астына түсіп өлгенде, иесін табу қиынның қиыны. Жауапкершіліктен бәрі жалтарады. Мұнда олар төлейтін айыппұлдан қашады. Егер қолданыстағы заңнамаларға жүгінетін болсақ күндізгі уақытта, яғни 08.00-21.00 аралығында төрт түлік темір жолдың бойына немесе станция басында ауа жайылып, қауіпсіздік туғызатын болса бақташы жауап береді, ал бұл уақыттан тыс аралықта мал иесі жауап беруі керек, сондықтан оларға қалай да айыппұл төлетудің жолын табу керек», деп санайды ол. Мысалы, кеше ғана Сарышаған станциясында локомотив түйені басып кетіпті. Ал оның иесі әлі күнге табылмай отырғанға ұқсайды. Ал адам басу оқиғасы көбіне Жамбыл – Талас телімінде жиі орын алады екен. Мұнда екі бағытта жүретін пойыздардың қатынау жиілігі және пойыздарды сұрыптау жұмыстары ауқымды жүргізіледі. Талдау көрсеткендей, пойыздардың астына ішкілік ішкен немесе суицидке бой алдырған азаматтар түсіп жатады. Оның үстіне өткелдерден өткенде ұялы телефонмен сөйлесуге, құлаққап киуге тиым салынатынын елеп-ескеріп жатқандары шамалы екен. Жиында желілік ішкі істер бөлімінің өкілдері өткен жылы болат жолдың бойында 994 азамат әкімшілік жауапкершілікке тартылғанын және телім бойында мал жайғаны үшін 32 тұлға да жауапкершілікке тартылғандығын жеткізді. Жиынды қорытындылаған бөлімшенің бас инженері Асылхан Тайлақбаев жекелеген қызмет өкілдеріне әлі де нақты сараптама жасауды тапсырды.

Мәселе – жауапкершілікті арттыруда

Басқа да жаңалықтар

«Қазақстан теміржолшысы» газеті, №99 22 қараша 2024 жыл