«Батыс» филиалында көктемгі комиссиялық тексеру қорытындыланды

 «ҚТЖ-ЖТ» ЖШС «Батыс» филиалында көктемгі комиссиялық тексеру қорытындысы өтті. Темір жол кәсіпорындары басшыларының қатысуымен өткен кеңейтілген кеңесте жетістіктер емес, ең алдымен анықталған кемшіліктер жіпке тізгендей баяндалды.

«Батыс» филиалының директоры Бөріхан Беркімбаев бүгінгі таңда жүк тасымалының желісі деңгейінде көктемгі тексеру жұмыстары толығымен аяқталғанын жеткізді. Орал бөлімшесімен бірге есептегенде филиал шекарасында жүргізілген тексерулердің қорытындысы бойынша барлығы 1020 ескерту анықталған. 

Тексеру барысында ғимараттар мен жасанды құрылыстарды, жұмыс орындары мен аумақтарды күтіп ұстау, жүк және коммерциялық жұмыстар, нормативтік-техникалық құжаттаманың мазмұны, еңбекті қорғау, жұмыс өндірісінің технологиясын сақтау, техникалық қызмет көрсету мәселелері бойынша бірқатар ескертулер мен кемшіліктер орын алғаны айтылды. 

Соның ішінде техникалық құралдар, қызметкерлердің  білімі, пойыз құжаттамасын жүргізу, КМО өткізілуі мен техникалық оқытуға басымдық берілуін назар аударуды қажет етеді. Сондай-ақ, комиссиялық тексеру кейбір станция нысандары инфрақұрылымының, өндірістік-техникалық базасының жағдайы қанағаттанарлықсыз екені анықталған. 

Әлі күнге дейін Орал вокзалында адамдар темір жолдың рұқсат етілмеген жерінен өтуін тоқтатар емес. Сондықтан автомобиль және жаяу жүргіншілер көпірінің маңында, локомотив депосының аумағында бақылауды күшейту, ақпарат құралдарын пайдаланып халыққа түсіндіру жұмыстарын тоқтатпай жүргізе беру, сондай-ақ теміржол күзеті, желілік полиция қызметкерлерімен бірлескен рейд жұмыстарын да көбейту тапсырылды. 

Шалқар-Сексеуіл учаскесінің ревизоры Бауыржан Орынбаев алдымен сөз алып, учаске бойында орналасқан станциялардың жұмысы туралы баяндады, жазғы тасымалға дайындықтары қанағаттанарлық екенін, өрескел бұзушылықтар болмағанымен бірқатар ескертулерді атап, комиссия жұмысы тиянақты атқарылғанын жеткізді. Көктемгі комиссиялық тексеру барысында анықталған бұзушылықтар бойынша кінәлі тұлғаларды жауапкершілікке тартуға бағытталған іс-шаралар әзірленетіні және анықталған кемшіліктерді жою мерзімі де белгіленетіні айтылды. Барлық деңгейдегі басшылар қозғалыс қауіпсіздігін қамтамасыз етуге және нормаларының мүлтіксіз сақталуын, сондай-ақ өз бөлімшелеріндегі қозғалыс қауіпсіздігінің жай-күйіне және осы мәселелер бойынша іс-шаралардың орындалуы барысына кезеңдік талдау жүргізілуі міндеттелді. 

Жиында Қандыағаш вагон пайдалану депосының жұмысы жақсы жағынан сипатталғанын да айта кеткен жөн. Басқа кәсіпорындармен салыстырғанда мекеме өз жұмысын жақсы жағынан көрсете алған, жазғы тасымалға жақсы дайындықпен келген.