Қызылордада келісім комиссиясының семинары өтті

Қазақстан Республикасы Еңбек Кодексінде жұмыс беруші мен жұмыскердің құқығы айқын көрсетілгенмен, кейде түрлі ахуалға байланысты даулы мәселе туындап, екі тарапты әуре-сарсаңға салатын кез де болады. Сондықтан осындай келеңсіз жайттардың алдын алуда келісім комиссиясына жүктелетін салмақ жеңіл емес.

Қызылорда темір жолында келісім комиссиясы мүшелерінің аймақтық семинары өтті. Жиналғандар осы салада аса тәжірибелі маман, ҚР Президенті жанындағы еңбек құқығы сарапшысы, құқықтық кеңес мүшесі Бибігүл Нұрашеваны тыңдап, талай құнды ақпараттарға қанықты.

Түрлі ситуациялық мәселелерге жауап іздеуден басталған семинарда жұмыс кезінде жолығуы мүмкін жайттардан мысалдар келтіріліп, олардың шешілу жолдары қарастырылып, түсіндірілді, ұсыныстар да жан-жақты сарапқа салынды. Мысалы, жұмыс беруші мен жұмыскер арасында туындаған кейбір мәселелерді шешуде тығырыққа тірелетін келісім комиссиясы мәселенің шешімін өкілетті маманның көрсеткен қағидалары негізінде жүргізуге тұжырым жасауы мүмкін. Бұл екі тарапқа да тиімді әрі оңтайлы жол саналады. Алайда ұжымдық келісімшарт не Еңбек кодексінің баптарына жүгінген дауласушы тараптар әртүрлі белгілі-белгісіз себептермен даудың шешілуін қиындатуы мүмкін, мұндай жағдайда барлық шараның заң қағидаларына негізделетінін ескермеген тараптардың қиындықтарға тап болуы заңдылық екені де семинарда жан-жақты түсіндірілді.

– Еңбек Кодексіне соңғы 6 жылда 21 рет өзгерістер мен толықтырулар енгізілді. Бұл жаман емес, себебі мұның бәрі жұмыс беруші мен жұмыскердің мүддесін қорғау үшін жасалған шаралар деп қабылдаған жөн. Бүгінгі семинарға қатысушылардың әрбірін толғандыратын сауал бар, олардың жауабын осы жерде, сіз бен біз бірге табатын боламыз. Бұл – тәжірибе жетілдіру, білім мен машық арттыру тәсілі. Өз тарапымнан айтылған ұсыныстардың алдағы уақытта құзырлы органдар тарапынан ескеруге тиіс екендігін және де соған орай іс-қимыл жасау қажеттігін назарда ұстайтын боламын, – деген лектор Ұлттық компанияның басшылық құрамымен жұмыс барысында кездесулер өткізілетінін, бірқатар ұсыныстар айтылатынын да жеткізді.

Кейде өз еркімен жұмыстан шығуға мәжбүр болған жұмыскердің арада белгілі бір уақыт өткеннен кейін өзінің жұмыстан шығарылуын заңсыз деп қайта арызданатыны, ал кейбіреулердің жұмыс беруші тараптың қысымына ұшырадым деп шағымдануы сынды жұмыс беруші мен жұмыскер арасындағы қарым-қатынаста кең тараған жағдай да талқыланып, оның шешімін табу нұсқалары да қаралды. Семинарға қатысушылар лекторға түрлі сауалдар қойып, кейбір даулы мәселелерге байланысты пікірталас та өрбіді.

Жиын соңында барлық тыңдаушыларға сертификат табысталды.