Ақтау портында жаңа басшы
«Ақтау халықаралық теңіз сауда порты» ҰК» АҚ президенті болып Абай Түрікпенбаев тағайындалды. Жаңа тағайындауды «ҚТЖ» ҰК» АҚ вице-президенті С.Елубаев еңбек ұжымына таныстырды, деп хабарлайды порттың баспасөз қызметі. Абай Ноғайұлы Түрікпенбаев 1964 жылы Оңтүстік Қазақстан облысында дүниеге келіп, 1986 жылы Казань химия-технологиялық институтын инженер-механик мамандығы бойынша тәмамдаған. Еңбек жолын зауытта химиялық құралдар жөндеу бойынша шебер болып бастаған. Одан кейін азот тыңайтқыш зауытында бөлімше механигі, жөндеу шебері, цех слесарі қызметін, «Каскор» АҚ менеджері, «МаңғыстауМұнайГаз» АҚ-да басқарма бастығының орынбасары, Павлодар мұнай химия зауытында коммерциялық директор, «ӨзенМұнайГаз» АҚ-да бақылау-талдау департаментінің директоры, «КазМорТрансФлот» компаниясында құрылыс нысандары дирекциясы директорының орынбасары, директоры, «ТеңізСервис» ЖШС-де бас директорының орынбасары, «Батуми Индастриал Холдинг ЛТД» директоры, «Қазмұнайгаз» компаниясының талдау және болжау департаментінің директоры, Ақтау портының порт құрал-жабдықтары мен күрделі құрылыс бөлімінің бастығы және соңғы 2015-2016 жылдары порттың техникалық мәселелер жөніндегі вице-президенті, 2016 жылдың қазан айынан «Құрық порты» ЖШС бас директоры қызметтерін атқарған.
Райхан РАХМЕТОВА