Қажымұрат Нағманов өмірден өтті
2022 жылғы 3 шілдеде Қазақстан Республикасының бұрынғы Көлік және коммуникация министрі, «Қазақстан темір жолы «ҰК» АҚ вице-президенті Қажымұрат Ыбырайұлы Нағманов өмірден өтті.
Қазақстанның көлік саласын дамытуға елеулі үлес қосқан тұлға еңбек жолын 1971 жылы Ленинград теміржол көлігі инженерлері институтын «инженер-құрылысшы» мамандығы бойынша бітіріп, жол шебері болып бастаған. Қазақ темір жолының Бас инженері болып тағайындалғанға дейін саладағы барлық қызмет сатыларынан өткен. Қазақстан Компартиясы Орталық комитетінің Көлік және байланыс бөлімінің нұсқаушысы, КАТЭП атом энергетикасы және өнеркәсібі кәсіпорындарының Қазақ мемлекеттік корпорациясының вице-президенті сынды мемлекеттік жауапты лауазымды қызметтерді атқарды. Жезқазған, Шығыс Қазақстан және Солтүстік Қазақстан облыстарын басқарды. 2002 жылы Қазақстан Республикасының Көлік және коммуникация министрі болып тағайындалды. 2005-2006 жылдары Қазақстан Республикасы Президентінің кеңесшісі болды. 2006-2008 жылдар аралығында «Қазақстан темір жолы «ҰК» АҚ вице-президенті болып қызмет атқарды. 2014-2020 жылдары Қазақстан Республикасы Автожол қауымдастығын басқарды. Ерен еңбегі мен жетістіктері үшін Қажымұрат Ыбырайұлы «Парасат» орденімен марапатталған. Қажымұрат Ыбырайұлы ашық та адал көзқарасы мен азаматтық ұстанымымен ерекшеленіп тұратын жауапкершілігі мол табанды жан ретінде көптің есінде қалды. Қай салада болсын өз ісіне деген жауапкершілігі пен табандылығы арқасында үлкен абырой мен беделге ие болды. Үлкен жүректі жаны жайсаң азамат, мемлекет қайраткері Қажымұрат Ыбырайұлы Нағмановтың қазасына орай туған-туыстары мен жақындарына шын жүректен көңіл айтамыз. Оның жарқын бейнесі біздің жүрегімізде мәңгі сақталады.
«Қазақстан темір жолы «ҰК» АҚ басшылығы мен ұжымы және ардагерлер кеңесі