Қазақстан мен Қытай арасын жалғайтын үшінші теміржол өткелі салына ма

Қазақстан мен Қытайды екі теміржол торабы байланыстырады. Алғашқы болып Қазақстанда 1991 жылы іске қосылған Достық – Алашаңқай және 2012 жылы салынып, пайдалануға берілген Алтынкөл – Қорғас теміржол өткелдері арқылы жүк тасымалы жылдан жылға ұлғайып жатыр. Сонымен қатар, Қазақстан мен Қытай арасын жалғайтын үшінші трансшекаралық теміржол салу туралы мәселе көтерілуде...

Бұған әсіресе, Қытай тарапы мүдделі көрі- неді. Жақында бұл туралы Бейжіңде өткен X бейбітшілік форумында Қытайдағы Қазақстан елшісі Шахрат Нұрышев мәлімдегенін қытайлық ресми ақпарат көздері жазды. 

Қазақстан елшісі Қазақстан мен Қытай арасында үшінші шекаралық теміржол салынатынын, алайда оның нақты қай жерден өтетінін, қашан құрылысы басталатыны жайлы ештеңе демеген. Кеме қатынасындағы қазіргі проблемаларға байланысты Қытай мен Еуропа арасында теміржол көлігіне сұраныстың арта түскенін еске салған Қазақстан елшісі форумда сөз болған Қытай – Қырғызстан – Өзбекстан темір жолының құрылысына қатысты да өз көзқарасын білдірді. 

Еске сала кетсек, Қытай мен Қазақстан арасында үшінші теміржол өткелі жайлы 2017 жылы да сол кездегі ШҚО әкімі Даниал Ахметов те үкіметтің кеңейтілген отырысында мәселе көтерген еді. Сол кезде Қытайдың ұсынысымен екі мемлекет үшін де тиімді болатын Қарамай (ҚХР) – Тачен (ҚХР) – Аягөз (ҚР) транзиттік теміржол құрылысының жобасы әзірленіп жатқаны айтылған. Бұл – Қытайдан Еуропаға жететін ең жақын жол болатыны сөз болған. 

Ал 2018 жылы Қытайдың Шыңжаң-Ұйғыр автономды ауданы Тачэн (Шәуешек) округі ресми делегациясының ШҚО-да өткен арнайы жұмыс сапарында да қытайлықтардың бірінші кезекте көтерген мәселесі Шәуешек – Аягөз теміржолын салу болған еді. Алайда шекаралық сауда аумағын дамыту, транзиттік жүк тасымалын арттыру, туризмді өркендету бойынша берері мол саналатын бұл жоба қарастырылуда ма, жоқ па, болашағы қандай, әлі белгісіз күйде отыр. Айта кетсек, Аягөз станциясы мен Шәуешек қаласының аралығы небары 270 шақырым ғана екен.