Жолаушылар пойыздарындағы қызмет көрсету сапасы тексерілуде
«Қазақстан теміржолшысы» газетінің тілшісі
ҚР Индустрия және инфрақұрылым министрлігі мен Сыбайлас жемқорлыққа қарсы іс-қимыл агенттігі ҚР ІІМ көліктегі полиция департаментімен бірлесе жолаушылар пойыздарында көрсетілетін қызметтердің сапасын арттыру мақсатында арнайы тексеру жүргізуде.
Қыркүйек айына дейін жалғасатын шара барысында бірқатар кемшіліктер анықталған. Әсіресе, пойыздардың техникалық жай-күйімен қатар тасымалдау кезіндегі қауіпсіздікке жіті назар аударылып отыр. Айталық, биыл өткен алғашқы бес айда темір жол саласындағы 220 кәсіпорынға тексеру жүргізілген. Соның нәтижесінде 4 091 бұзушылық анықталып, жылжымалы құрамның 47 бірлігін пайдалану тоқтатылған.
Сондай-ақ аумақтық көліктік бақылау органдары 200 жолаушылар пойызын тексеріп, жолаушыларды тасымалдау қағидаларының талаптарын бұзуға қатысты 431 кемшілік анықтаған. Билетсіз жолаушыларды тасымалдауға қатысты 33 оқиғаның жолы кесіліп, 31 млн теңге көлемінде айыппұл өндірілген. Қазіргі таңда жолаушылармен кері байланыс орнату және тасымалдау кезіндегі сапаны арттыру мақсатында Көлік комитетінің Ахуалдық орталығының базасында тәулік бойы арнайы Whatsapp нөмірі жұмыс істейді. Биылғы алты айда аталған желіге мыңнан астам өтініш пен шағым келіп түскен.