Ақтау порты «жасыл порт» сертификатын алды
«Қазақстан теміржолшысы» газетінің тілшісі
Ақтау теңіз сауда порты Еуропадағы қауіпсіздік және ынтымақтастық ұйымының «EcoPorts Pers» сертификатына ие болды.
Порттардың экологиялық сараптама жүйесіндегі «жасыл порт» сертификаты Ақтау портының халықаралық және еуропалық деңгейде жұмыс жасай алатынын көрсетеді. Ақтау сауда порты экологиялық, жұмыс процесі барысындағы қауіпсіздік стандарттарына толық жауап береді.
– Бұл өз кезегінде біздің тұтынушылар алдында барлық талаптарға сәйкес келетін, жоғары сапалы қызмет көрсететін порт екенімізді білдіреді, – деді порт басшысы Абай Түркпенбаев.
Халықаралық сертификатты табыстау шарасына ЕҚЫҰ хатшылығы мен Еуропадан келген делегациясы және осы ұйымның энергетикалық қауіпсіздік саласындағы бағдарламалар жөніндегі аға қызметкері Дэниел Кросс, Маңғыстау облысы әкімінің бірінші орынбасары Бекбол Орынбасаров қатысты. Қатысушылар Ақтау портының алдағы уақытта Еуразияның логистикалық және сауда орталығына айналуға мүмкіндік ашқанын, ірі порттармен ынтымақтасуға болатынын атап өтті.