Атырау облысында жеңіл көлік жүк пойызымен соқтығысты
«Қазақстан теміржолшысы» газетінің тілшісі
Атырау облысында жеңіл көлік жүк пойызымен соқтығысып, апат салдарынан жолаушы қаза тапты. Ал жүргізуші ауыр халде ауруханаға жеткізілді.
Оқиға 13 шілде күні Мақат станциясынан 20 км қашықтықтағы Мақат – Қарауылкелді телімінде күндізгі уақыт 11 сағат 45 минутта болған. Өткелдің белгі беру құрылғысы жұмыс істеп тұрған. Ал пойыз 45 км/сағат жылдамдықпен келе жатқан. Lada Granta көлігінің 23 жасар жүргізушісі теміржолдың басқарылатын өткелінен өтерде жол қозғалысы ережесін өрескел бұзып, пойыздың алдынан өтіп кетпекке ұмтылған. Төтенше жағдайлар департаментінің мамандары қаза болған жолаушының денесін көліктен арнайы аспаптың көмегімен шығарып алған. Қазіргі кезде қайғылы оқиғаға қатысты мемлекеттік құзырлы орындар тарапынан тергеу-тексеру жұмыстары жүріп жатыр.