Жаңасемей – жүк станциясы

Жаңалықтар

21.02.2017, 11:34

Жаңасемей станциясы – Семей қаласының ғана емес, күллі облыс бойынша өндірістік тұрғыдан аса маңызды саналатын өнеркәсіптік ауданда орын тепкен. Биылғы жылы құрылғанына тоқсан жыл толатын станция өткен жылды нәтижелі қорытындылады. Үш бағытта қызмет көрсететін 1-ші класты станцияның жүгі жеңіл емес. Бөлімше бойынша жүк тиеу жұмыстарының басым бөлігі осы станцияда атқарылғандықтан, «жүк станциясы» аталуы орынды. Шаһардың сол жағалауында орналасқан «Жаңасемей шпал зауыты» АҚ, «Шығыс Қазақстан ұн-құрама жем комбинаты» АҚ, «Семей ет комбинаты» АҚ, «Семей цемент зауыты» АҚ сынды республика нарығында «алпауыт үлесі» бар алып компанияларға қызмет көрсететін «жүк станциясының» әлгі кәсіпорындардың бәріне апаратын кірме жолдары бар. –Өткен жылы жүк тиеу жұмысы 1425565 тоннаға жетті. Бұл алдыңғы жылмен салыстырғанда 74707 тоннаға артық көрсеткіш. Жоспарлы шаралар артығымен, межеден асыра орындалды. Сол тәрізді негізінен өнеркәсіп шикізаттарынан тұратын жүк түсіру жұмыстары да жыл сайын артып келеді. Алдыңғы жылғы көрсеткішпен салыстырғанда 1772 вагонға артық жүк түсірдік. Осынау бағыттағы жұмыстарды биыл ширата түсу көзделуде,– дейді Жаңасемей жүк станциясының бастығы Тілеуғали Ибраев. Станциялықтар бұл жетістікке жылжымалы құрам қозғалысын жүйелі түрде реттеп, жұмыстың тиімділігін арттыру нәтижесінде қол жеткізіп отыр. Өндірістегі өнімділікке баса көңіл бөлгендіктен бұл тарапта қадау-қадау шаралар атқарылды. Мәселен, жүк вагондары паркінің жұмысы белгіленген нормативтен шегерілді. Яғни, тәулігіне 60 вагонға азайтылған. Соның есебінен жоспарлы шаралар еселеп, көрсеткіш әр вагон бойынша 3,28 тоннаға артыпты. Оның ішінде транзиттік вагондарды өңдеу 112,1, ал жергілікті вагондарды өңдеу ісі 113,6 пайызға жоғарылады. Жылдың төрт мезгілінде де жүк тиелімі ауқымды, бір сәтке де толас таппайтын станция үшін бұл жетістіктердің маңызы зор. Сондықтан да, биылғы жылы да жүк тиеу мен түсіру, жүк пойыздарын жолға әзірлеу бойынша жаңа техникалық үдерістер игілігіне ден қойылмақ. Осынау қауырт жұмыстарға қарамастан өткен жылы Жаңасемей станциясы бойынша маневрлік қозғалыс, жүк пойыздарын жасақтау және тасымалданатын жүктер қауіпсіздігін сақтауда еңбек тәртібіне бірде-бір мәрте нұқсан келмепті.

Жаңасемей – жүк станциясы

Басқа да жаңалықтар

«Қазақстан теміржолшысы» газеті, №56 05 шілде 2024 жыл