Ең бағалы байлық

Жаңалықтар

21.02.2017, 12:45

Дегелең – Семей телімінің 270,2 шақырымында орналасқан 4 класты Шаған станциясы кеңес дәуірінде атом бомбасының сынағын жүргізетін әскерилер қалашығы болған деседі. Іргедегі Семей ядролық полигоны жабылып, ел егемендік алған соң бұл елді мекен теміржолшылар кентіне айналды. Қазіргі күні мұнда тұратын жүзден аса отбасының дені шойын жол саласында еңбек етеді. Өткен ғасырдың 90-шы жылдары тұралап қалған елді мекенді теміржолшылар аяғынан тұрғызған. Қазіргі күні Шаған кентінің әлеуметтік ахуалын көтеріп тұрған сала темір жол десек қателеспейміз. Бұл пікірмен жергілікті атқарушы билік өкілдері де келіседі. Мәселен, кент әкімі Талғат Құмаровтың айтуынша, Ұлттық компанияның шарапаты аса мол болып тұр. Атап айтсақ, ел Тәуелсіздігінің 20 жылдығында «20 жылға – 20 жарқын іс» акциясы аясында Ұлттық компания балалардың ойын алаңқайын салып беріп, орталық көшелерге жарық орнатыпты. Одан бергі бес жыл ішінде де теміржолшылар тарапынан көрсетіліп жатқан көмек аз емес. Бір ғана мысал, ауылдағы бірнеше көше мен 8 бірдей көпқабатты үйді ауызсумен қамтып отыр. Және басты ерекшелігі сол, ол үшін шағандықтар ақы төлемейді. Облыс бойынша ауыз су мәселесі өткір тұрғанын ескерсек, бұл елеулі жетістік. Сондықтан, шағандықтар үшін ең бағалы байлық – осы ауыз су. Қазіргі күні Жаңасемей мен Дегелең аралығындағы станцияларға «Теміржолсу-Павлодар» ЖШС қызмет көрсетеді. Шаған станциясының сушысы Болат Байжұмановтың айтуынша, мұнда тәулік бойы су үзіліссіз беріледі. Тұрғындарды тіршілік нәрімен қамтуда ешқандай іркіліс жоқ. Қызмет көрсету сапасы қалалық жерлермен бірдей. –Шағандағы су сорғысы «Мөлдір бұлақ» бағдарламасы аясында соңғы жылдары толықтай күрделі жөндеуден өтіп, заманауи талаптарға сай етілді. Автоматтандырылған жүйенің қуаттылығы аса жоғары. Сондықтан кенттегі халықты толығымен сумен қамтимыз. Бір кездері Семей сынақ полигонының өтінде болып, құлазыған құнарсыз далаға айналған өңір үшін бұл ең үлкен әлеуметтік көмек. Бұл Ұлттық компанияның жергілікті тұрғындарға жасаған ең үлкен тартуы болып отыр, халықтың алғысы шексіз, – дейді Болат Байжұманов. Қазіргі күні табиғаты аса қатаң өңір үшін ауыз су алтынмен пара-пар. Мұндағы теміржолшылар қауымы полигон аумағында тұрғаны үшін мемлекет тарапынан тиесілі әлеуметтік көмектер алады. Әйтседе, әр үйге құбырмен жеткізілген ауыз су соның барлығынан да бағалы саналады. Бұл пікірді станция басшысы Айдос Тоқтаров та қостайды. –Ел Тәуелсіздігінің 25 жылдығы қарсаңында келген таза су Шаған кенті үшін жасалған ең үлкен тарту болды, оның үстіне ол тегін беріледі, – деді ол. Биылғы күздің соңында су сорғы нысанның аумағы ат шаптырым болатын кең ауласы теміржолшылардың өз күшімен абаттандырылыпты. Тәуелсіздіктің 25 жылдығы құрметіне Семейден әкелінген 25 дана шырша көшеттері отырғызылған. Бұл бүгінгі күннен ертеңгі буынға арналған естелік болмақ.

Ең бағалы байлық

Басқа да жаңалықтар

«Қазақстан теміржолшысы» газеті, №56 05 шілде 2024 жыл