Түбек темір жолы жаңарып жатыр

Маңғыстау темір жолында күрделі жөндеу биыл қарқынды жүруде . Биылғы жоспардың жартысынан астамы орындалды. Күрделі жөндеу жұмысын «Теміржол жөндеу» компаниясының ПМС-Ақтөбе мекемесі қолға алған.

Жалпы, биылға жоспарланған меже 72.6 шақырым болса, қазір соның 45,462 шақырымында күрделі жөндеу жасалып бітті. Жөндеу жұмыстары наурыз айының ортасында басталған. 2 маусымға дейін №3 бекет-Үстірт-5 бекеттердің 74-103 км аралығындағы 28,650 шақырым жол жөндеуден өтті. Аталған телімде осыған дейін пойыздар жылдамдығы сағатына 60/50 шақырым болса, жөндеуден кейінгі жылдамдық 100/80 шақырымға дейін көтерілді. Күрделі жөндеу барысында телімдегі ескі ағаш шпалдар темірбетонды шпалға ауыстырылып, ұзын бунақтар салынды.  

– Жөндеу жұмыстарының екінші кезеңі 21 маусымда басталды. Содан бері №14-15 бекеттері арасындағы 19,292 шақырым жолды жаңарттық. Негізгі жоспар 22,0 шақырым болатын. Бұл жолдарға ұзындығы 725 метрлік 32   бунақ төселеді. Жұмыстар толық аяқталғасын аталған бұл телімде де қозғалыс жылдамдығын сағатына 100/80 шақырымға дейін жеткізуге болады. Осыған дейінгі жылдамдық сағатына 70/60 км құрайтын, – дейді күрделі жөндеу туралы ақпарат берген Маңғыстау магистральдық желі бөлімшесі жол бөлімінің инженері Ерлан Аманжолов.  

Айтуынша, жыл соңына дейін тағы да 22 шақырым жол күрделі жөндеуден өткізіледі. Ол – №16-Тамақ бекеттерінің 377- 398 км аралығындағы жолдар. Бұл телімде де бүгінде пойыздар 70-60 км/сағатпен жүріп жатыр. Күрделі жөндеуден соң жылдамдық 100/80 км/сағатқа дейін артады деп күтілуде.

Бүгінде күрделі жөндеуге алпыс адам жұмылдырылған. Негізгі жұмысты жүргізіп жатқан ПМС-Ақтөбе – осы салаға маманданған мекеме болғандықтан сапасы күмән тудырмайды. Жұмысқа ВПО, ЭЛБ, МПД, Автогрейдер, Трактор, ПРБ, Дуомат USP, т.б. техникалар тартылған. Түбек темір жолы осылай кезең-кезеңмен жаңарып жатыр...