Теміржолшы арулар спартакиаданың финалына жолдама алды
Маңғыстау облысы бойынша меншікті тілші
Тамыздың 13-14 күндері батыс аймағы бойынша «Самұрық-Қазына» АҚ компаниялар тобы қызметкерлері арасындағы VІІ спартакиаданың бірінші іріктеу кезеңі өтті. Сайыста төрт өңірден жиналған спортшылар арасынан суырылып шыққан екі теміржолшы ару финалға жолдама алды, деп хабарлайды Rail-news.kz.
Іріктеу жарысына түбектегі теміржол мекемелерінен қырық адам қатысты. Оның ішінде жүк тасымалы мен магистральдық желі бөлімшесінен, «Вагонсервис» және «Қазтеміртранс» компанияларының жергілікті филиалдарынан теміржолшылар бар. Барлығы үш футбол командасы, бір волейболшылар тобы, үстел теннисінен екі, тоғызқұмалақтан бір, шахматтан үш, стрейтболдан төрт адам жарыс жолына түсті.
– Үстел теннисін өте шебер меңгерген «Қазтеміртранс» мекемесінің қызметкері Салтанат Иманғалиеваға тең келер ойыншы табылмады. Барлық қарсыластарын ойсырата ұтқан теміржолшы ару бірінші орынды иемденді. Ал ұлттық ойын тоғызқұмалақтан Маңғыстаустанциясының еңбекті қорғау инженері Айгүл Аяпова шеберлігін көрсетті. Қарсыласының біреуінен бірнеше ғана ұпай аз жинап, екінші орынды алғаны болмаса, құмалақтардың бәрін ақылмен сырғытып, өте жақсы ойын үлгісімен көрерменін тәнті етті. Екі қызымыз да қыркүйек айында елордада өтетін суперфиналға жолдама алып, бәрімізді қуантып отыр, – дейді Маңғыстау темір жолының спорт нұсқаушысы Нұрайна Қыдырова.