Дуальдық жүйе жемісін беруде

Жаңалықтар

10.03.2017, 14:51

«Қазақстан темір жолы» ҰК» АҚ пен Ақтөбе көлік, коммуникациялар және жаңа технологиялар колледжі бірлесе отырып, дуальды білім беру жүйесін енгізгені белгілі. Содан бері жүздеген болашақ теміржолшы теорияны өндірістік орындарда тәжірибемен сабақтастырып келеді. Рас, колледж басшылығы дуальды білім беру жүйесіндегі заңнамаларды жетілдіру керектігін айтады. Дуальды білім беру жүйесін енгізуге мүмкіндігі бар кәсіпрындарға талаптар бекітіліп, оқыту орындары, оқу полигондары және шеберханалар қажет. – Осы жүйені енгізгенімізге төрт жылдан асып барады. Ақтөбе облысында 27 кәсіпорынмен дуальды білім беру жүйесі бойынша ынтымақтастық орнатқан болсақ, оның 23-і теміржол мекемелері. Негізінен төрт бағыт бойынша, Ақтөбе жүк тасымалы бөлімшесі, «Транстелеком» компаниясының филиалы, «Қамқор Локомотив» және Ақтөбе байланыс және белгі беру дистанциясымен қоян-қолтық жұмыс жасап келеміз, – дейді колледж директоры Жеңіскүл Мұхамбетпайызова. Оқу орны басшысының айтуынша, бүгінде дуальды білім беру жүйесі бойынша «Қазавтожол» компаниясымен де келіссөздер жүргізіліп жатыр екен. Дуальды білім беру жүйесі Ақтөбедегі теміржолшылар даярлайтын колледжде 2013 жылы енгізіле бастады. Алғашқы жылы тәжірибе ретінде «Автоматика, телемеханика және теміржол көлігінде қозғалысты басқару», «Теміржолдағы жылжымалы құрамды пайдалану, жөндеу және техникалық қызмет көрсету», «Теміржол көлігіндегі тасымалды ұйымдастыру және қозғалысты басқару» мамандықтары бойынша оқитын студенттер теміржол мекемелерінде өндірістік тәжірибеден өте бастады. Жаңа жүйе бойынша білім беру мақсатында оқытушылар құрамы дуальды білім беру ертерек енгізілген Сингапур, Германия, Австралия, Беларусь елдеріне іссапармен барып келді. Алғашқы жылдары жаңа жүйе бойынша колледжбен серіктес болу жөнінде Ақтөбе жол дистанциясы, «Ақтөбе локомотив пайдалану депосы», «Лизинг Ақтөбе», т.б. теміржол мекемелері меморандумға қол қойды. – Колледж басшылығы «Оқу орны тек мамандарды даярлап қана қоймай, теміржол көлігінің дамуына көмектесу керек» деген қағиданы ұстанады. Дуальды білім беру жүйесі студенттерге тәжірибеден өтуде үлкен мотивация береді. Өйткені оқу орнында алған теориялық білімін тәжірибеде қолдану мүмкіндігі бар, – дейді Жеңіскүл Мұхабетпайызова. Колледж директорының айтуынша, жаңа жүйе енгізілгелі колледжден 100-ге тарта түлек Мақат, Ақтоғай, Атырау, Ақтөбе, Аягөз, Балқаш, Павлодар, Екібастұз, Қостанай жүк тасымалы бөлімшелеріне жұмысқа орналасқан.

Дуальдық жүйе жемісін беруде

Басқа да жаңалықтар

«Қазақстан теміржолшысы» газеті, №99 22 қараша 2024 жыл