«Вагонсервис» АҚ мен колледж арасында меморандум жасалды
«Қазақстан теміржолшысы» газетінің тілшісі
«ҚТЖ» ҰК» АҚ мекемелері елордадағы М.Тынышпаев атындағы Қазақ көлік және коммуникациялар академиясының филиалы – Ақмола колледжінде өткен «Жұмыс беруші күніне» қатысты.
Іс-шараға колледжбен әлеуметтік серіктестік орнатқан кәсіпорындар, атап айтқанда, «Вагонсервис» АҚ, «Электровоз құрастыру зауыты» ЖШС, Астана белгі беру және байланыс дистанциясы, Астана локомотив пайдалану депосы, Астана станциясы, «ҚТЖ-Жүк тасымалы» ЖШС филиалдары, «Қамқор Локомотив» ЖШС, Астана локомотив жөндеу депосы және т.б кәсіпорындар шақырылды. Жұмыс берушілер күніне келген қонақтар алдымен колледж шеберханаларының жұмысымен танысты. Қатысушылар жұмыс тәжірибелерімен бөлісіп, колледж түлектеріне сұраныс артқандығын атап өтті.
Колледж директорының орынбасары Бибіжан Аймағамбетованың айтуынша, оқу орнын бүгінге дейін 7 мыңға жуық теміржол саласының түлектері бітіріп шыққан. Бүгінде теміржол мекемелерімен 18 меморандум жасалып, 45 келісімшартқа қол қойылған. Жыл сайын темір жолда 180-250 білім алушы өндірістік және дипломалды тәжірибелерден өтеді. Колледж түлектері Нұрлы жол вокзалына, «Қамқор Локомотив» ЖШС, Астана локомотив жөндеу депосы, Астана станциясы, «Жолаушылар тасымалы» АҚ-ның Солтүстік аймақтық филиалына және басқа да өңірлері бойынша жұмысқа орналасуда.
«Жұмыс беруші күні» шеңберінде «Вагонсервис» АҚ мен колледж арасында келісімдер жасалып, бірлесе атқаратын жұмыстар бойынша меморандумға қол қойылды. Колледж студенттері «Мамандықтар шеруі» қойылымын қойып, әр мамандықты таңдаудағы мақсаттары мен болашақтағы білікті мамандарға не қажеттігін баса айтып өтті. Іс-шара соңында теміржол өкілдері ҚР Білім ағарту министрі А.Аймағамбетовтың, Астана қаласы білім басқармасының басшысы Қ.Сенғазыевтың, колледж директоры Г.Нұрманованың Алғыс хаттарымен марапатталды.
Соңында «Қамқор Локомотив» ЖШС Астана локомотив жөндеу депосының басшысы атынан колледж ұжымына алғыс хаттар беріп, оқу орны кітапханасына теміржол мамандығына қажетті оқулықтарды табыстады. Сонымен қатар теміржолшылар болашақ сала мамандарының білікті болуына өз үлесін қосу мақсатында қазіргі заманғы локомотив электр тізбектерінің стендін тарту етті. Бұл колледж білім алушылары үшін үлкен көмек болмақ.