Техникалық қауіпсіздік жайын сараптады

Жаңалықтар

28.03.2017, 14:47

Осы жылдың 13-17 наурызы аралығында IOSH еңбек және қауіпсіздік институты теміржол тобының төрағасы Кит Мори Астанада Қазақстан теміржолының нысандарын аралап, техникалық қауіпсіздік жағдайын саралады. Іс-сапарының қорытындысын шетелдік сарапшы ұлттық компанияның өндірістік қауіпсіздік және экология департаментінің директоры Ақболат Жағыпаров бастаған теміржолшыларға айтып, нысандар жұмысынан байқаған кемшіліктер мен көз жеткізген жетістіктер туралы ақпарат берді. Еуропалық қайта құру және даму банкі мен «Қазақстан темір жолы» компаниясы арасында 2010 жылдан бастап қол қойылған келісім шеңберінде аталған банк ұлттық компанияның бірнеше жобаларын қаржыландырады. Осы келісім аясында жүзеге асқан Кит Моридің келісі қазақстандық теміржолшылардың техникалық қауіпсіздік сақтаудағы жұмысын сырт көзбен бағалап, сол арқылы болашаққа бағам жасауға мүмкіндік берді. –Бұл кездесудің ең басты мақсаты – өзара тәжірибе алмасу. Біз сұрыптау станциясы, локомотив және вагон депосын, шеберханаларды, жол бойларын, диспетчерлік, техникалық қызмет көрсетуді, жылжымалы құрамды, т.б. нысандарды аралап, қауіпсіздік ережелерінің барлық тармақтарының сақталуын қарап шықтық. Атап өтерлік жақсы жұмыстар жасалуда. Тазалықтың жоғары деңгейде екеніне, барлығы нұсқаулыққа сай жүзеге асатынына көз жеткіздік. Жұмыс персоналының жауапкершілігіне көңіліміз толды. Алайда кемшіліктер де бар. Мысалы, атап айтар болсам, сол ережелерді тым қатты ұстанатындықтарыңыз сондай, қызметкерлермен басшылардың еркін қарым-қатынасы жоқ, оларды техникалық қауіпсіздік бойынша жеткен жетістіктерін қолпаштау, ынталандыру жағын күшейту қажет. Және тағы бір айта кетерлігі, өндірісте қауіпсіздікке байланысты қорғаныш құралдарын, киімдерін толық пайдалануда басшылық бірінші болып үлгі көрсетуі керек. Бұл өте маңызды. Міне, осындай бірқатар ұсыныстар бар, – деді Кит Мори мырза. Қазақстан теміржолындағы бес күн ішінде сарапшымен өткен жиындарда еңбек қызметі мен түрлі ауырлықтағы қиындықтар талқыланды, олардың сипаты, зерттеу тәсілдері, қабылданған түзету шаралары, қауіпсіздік деңгейін арттыруға кедергі келтіретін кемшіліктерді анықтау, бастапқы ұсыныстар айтылды. Ірілендірілген Астана жол дистанциясында жұмыс орындарындағы қауіпсіздік бойынша рәсімдер мен рөлін зерттеу үшін диспетчерлік қызмет, жылжымалы құрам, нысандар, қауіп белгілері мен арнайы белгі бергіштер қаралды. А. Жағыпаров теміржолшылар атынан шетелдік әріптеске өзара ынтымақтаса жасалған жұмыс нәтижесі үшін алғысын білдірді.

Техникалық қауіпсіздік жайын сараптады

Басқа да жаңалықтар

Қазақстан теміржолшысы газеті, №46 16 маусым 2026 жыл