«Жас темір» жастарының жетістігі

«ҚТЖ» ҰК» АҚ-да былтыр 1 қаңтарда басталған «Жас Темір» жас мамандарды дамыту бағдарламасының 1-ротациясының қорытындысы шығарылды. Жиынға «ҚТЖ» ҰК» АҚ аппарат басшысы Серік Кеулімжаев бастаған басқа да департамент басшылары қатысты.  

Бағдарлама компания кәсіпорындарын теміржол саласы бойынша даму перспективалары және тәлімгерліктің үздік тәжірибелерін енгізуді ескере отырып, білікті мамандармен қамтамасыз етуді көздейді. Жас мамандар бес кезеңнен тұратын конкурстық іріктеуден өтеді. Бағдарламаның басты артықшылығы компанияның тәжірибелі қызметкерлері қатарынан жеке тәлімгерлердің басшылығымен жас мамандарды жедел дамыту болып табылады. Қатысушылар 3 ротациядан өтеді, олардың әрқайсысы 5 айға созылады. Жас маман әрбір ротация алдында оқытылады, олардың жеке тәлімгерлері болады, негізгі мамандық бойынша 3 ротациядан өтеді, ай сайын жалақы төленеді, жатақхана компания есебінен беріледі. Мақсаттарды жоспарлау және жеке даму жоспарлары бекітіледі және кәсіби мамандармен жұмыс жүргізеді.  

Осы бағдарлама бойынша оқуға қабылданып, ротацияның бірінші 5 айынан өткен 5 маман қорытынды жиында өздерінің жоба аясында үйренгендерін ортаға салды. Мәселен, солардың бірі – Арыстан Жұман алғашқы ротациясын «KTZ Express» АҚ – да техникалық саясат департаментінде өткен.  

– Теміржол саласында жоғары білім алып, оқуды 2021 жылы бітірдім. Былтыр осы бағдарлама туралы естіп, қатысуға бел будым. Барлық кезеңдерінен өткеннен кейін бізді жазда Астанаға шақырды. Қарағанды қаласынан келдім. Жатақханаға орналастырып, жұмыс орнымызды көрсетті, сөйтіп қыркүйекте жұмысты бастап кеттік. Басында көбіне таныстыру, үйрету бағытында жұмыс жүргізілді, бірте-бірте жұмыс ауқымы артты және күрделене түсті. Бағдарлама аясында 1 жарым жылда толыққанды теміржолшы болып шығуымыз керек. Келесі 5 айлық ротация кезінде жаңа департаментке ауыстырады. Менің жұмысым көбіне құжаттармен байланысты, – дейді А. Жұман.  

Одан бөлек  ротациясын таныстырған Әйгерім Шымырбаева «ҚТЖ-Жүк тасымалы» ЖШС маркетинг және сервистерді дамыту департаментінде менеджер ретінде тәжірибеден өтті.  

– Ротация кезінде атқарған жұмыстарым көп. Атап айтқанда, эко жүйе және электронды құжат айналымымен, мәліметтер базасымен жұмыс істеуді үйрендім. «Rail –Тариф»,  Rail-Атлас» бойынша жұмыс істедім, шетел теміржол әкімшіліктері арасында бизнестік қарым-қатынас құрдым. Клиенттердің Жүк тасымалы қызметтеріне қанағаттану деңгейі бойынша онлайн сауалнама жүргіздім. ҚР ИИДМ, ҚР Бас прокуратурасы, ҰЭМ, АШМ және адвокаттық кеңселермен жұмыс жүргіздім. Маркетолог ретінде жарты млн астықтың транзит арқылы тасымалдануына және ҚТЖ экономикасын арттыруға үлес қосуға тырыстым, – деді сөз алған Ә. Шымырбаева. Сонымен қатар ол жұмыс өнімділігін арттыруға бағытталған ұсыныстар бергенін де жеткізді.  

Сол сияқты өзге де бағдарлама қатысушылары - Аян Шарапат, Елдар Ахметбеков және Мадияр Жәдігеров те өздерін таныстырып, тәжірибе кезінде не үйренгенін арнайы слайдтар арқылы баяндады. Жастардың жігері мен ынтасына, талабына риза болған басшылар оларға сұрақтар қойып, алдағы арман-мақсаттарын толығырақ білді және сол мақсаттарға жетер жолда сәттілік тіледі. Жас мамандар осындай алып компанияда жұмыс істеуге баулып, оларға осыншама жағдай жасап отырған ҚТЖ компаниясы басшылығына алғыс білдірді және теміржолды дамытуға барынша күш салатынын жеткізді.