Колледж студенттері тәжірибе жинақтауда

М.Тынышбаев атындағы Ақтау көлік колледжінде оқып жатқан болашақ теміржолшылар түрлі тәжірибеден өтіп, кәсіби білімдерін жетілдіре түсуде.  

Екінші курста оқитын бір топ студент теориялық білімін тәжірибемен ұштастыру мақсатында теміржол мекемелерінде сынақтан өтуде. Сондай-ақ жуырда колледждің бір топ студенттері «Теміржол рельс тізбектері қондырғыларының жұмыс жасау принциптерімен танысу» тақырыбында ұйымдастырылған арнайы тәжірибелік сабаққа қатысып, рельс тізбектерінің қыр-сырына қанықты. Ал «Каскор-Транссервис» теміржол мекемесінде өндірістік тәжірибеден өтіп жатқан студенттерге сигнал беру, орталықтандыру, бұғаттау және байланыс учаскесінің бастығы А.Аманжоловтың басшылығымен тәжірибелік дәрістер өтіп жатыр.    

Оған қоса білім ордасында қазір «Автоматика, телемеханика және локомотив шаруашылығы» бөлімшесінің арнайы пән оқытушылары «Worldskills Kazakhstan» жобасына қатысу үшін дайындық жүргізуде. Бұл әзірлік кезеңінде де шәкірттер біраз дүниеден хабардар болып, тәжірибелерін толықтыра түсті.  Аталған жобаның колледжішілік кезеңі сегіз құзыреттілік бойынша өтеді. Олар – Логистика; Автоматика, телемеханика және теміржол көлігіндегі қозғалысты басқару; Теміржолдың жылжымалы тартқыш құрамын пайдалану, жөндеу және техникалық қызмет көрсету; Автомобиль көлігіне техникалық қызмет көрсету, жөндеу және пайдалану; Теміржол құрылысы, жол және жол шаруашылығы; Теміржол көлігінде тасымалды ұйымдастыру және қозғалысты басқару; Жол қозғалысын ұйымдастыру; Теміржолдың жылжымалы тартқыш құрамын пайдалану, жөндеу және техникалық қызмет көрсету.