Мақаттың қызы

Жалпы, Атырау өңірінде жергілікті кадрлардың қалыптасуы Мақаттан бастау алады. Тоғыз жолдың торабы саналатын Мақатта темір жол кәсібі бүгінде ұрпақтан ұрпаққа ауысып, сабақтастыққа ұласты.

Яғни, сонау 1960 жылдардың ортасында қалыптасқан теміржолшылардың балалары, немере, шөберелері бүгінгі күні шойынжолда абыройлы еңбек етуде. Біздің кейіпкеріміз Ұлмекен Құрманқұлова 1965 жылы Мақат кентінде дүниеге келіпті. Әкесі Ғарифолла құқық саласында қызмет атқарса, анасы Мағира локомотив депосында, өндірістік-техникалық қызмет көрсету бөлімінде еңбек еткен. Ұлмекен де мектеп бітірген соң еңбек жолын станцияда вагондар нөмірін жазатын санақшы болып бастап, аз-кем тәжірибе алған соң осы салада біржолата бағын сынауға шешім қабылдап, Алматы темір жол көлігі инженерлері институтына оқуға түседі. Оны тасымалды ұйымдастыру және басқару мамандығы бойынша бітіреді. Сосын өз мамандығы бойынша қозғалыс саласына ауысып, 2002 жылы Мақат станциясының кезекшісі, ал 2011 жылдан күні бүгінге дейін станциялық диспетчер болып қызмет атқаруда.  

– Тоғыз жолдың торабында орналасқан Мақат станциясы арқылы жүк және жолаушылар пойызы әрлі-берлі толассыз ағылып жатады. Станциялық диспетчердің міндеті – сұрыптау жүйесін, маневрлік жұмыстарды бақылау, станциядағы техникалық құралдарды тиімді пайдалану, станция жұмысын алдын ала жоспарлау, пойыздарды қабылдау-жөнелту, тарату-жинақтау, бос вагондарды реттеу сынды жұмыстар. Өзім осы Мақатта туып өскен соң, көзімді ашқаннан көріп келе жатқаным – темір жол. Менің өмірім де, өнерім де, бақытым да осы темір жол деп білем, – дейді Мақаттың қызы.  

Өзінен үлкен екі апасы да теміржолшы болды, бірі депода, бірі қызмет көрсету пунктінде еңбек етіп, бүгінде зейнеткерлікке шыққан. Ұлмекеннің жолдасы Мұрат – мұнайшы. Екеуі ұл-қыз тәрбиелеп өсіріп, олардан бүгінде немере-жиен сүйіп отыр. «Жұмыста да, отбасында да бәрі жақсы. Өзім биыл 58-ге шығамын. Зейнеткерлікке дейін үш жыл бар. Соған аман-есен жетейік. Темір жол – менің туған Мақатым үшін негізгі тіршілік көзі. Сондықтан оның түтіні түзу шыққанын қалаймыз. Жетістік те, кемшілік те аз емес, техникалық құралдар ескіріп жатыр, ғимараттар тоза бастады. Бәрін жаңартатын кез келді. Жас буындар жаңаша жұмыс жасаса екен дейміз. Еңбек орнында әсіресе нәзік жандарға жайлы болғанын қалаймыз. Мейрам құтты болсын, өмірге шуақ сыйлайтын қыз-келіншектеріміз бақытты ғұмыр кешсін», – дейді Ұлмекен Ғарифоллақызы.