Атырауда Көрісу мерекесі тойланды

Көрісу – Батыс өңірде кең таралған дәстүр. 14 наурызда жаңа ай туды, көктем келді деп есепетелінеді. Халық қыстан аман-есен шыққанына қуанып, бір-бірімен қол алысып, төс қағыстыра амандасады. Биыл осындай мереке Атырау өлкесінде бұқаралық сипат алып, кеңірек атап өтілді.  

Атырау әуежайы мен темір жол вокзалында, қоғамдық көліктерде халықтың көңілін көтеру мақсатында домбыра-сырнаймен ән айтылып, «ақ мол болсын!» деп жолаушыларға шұбат пен бауырсақ ұсынылды. Көрісу күніне орай Махамбет Өтемісұлы атындағы академиялық қазақ драма театры алаңында «Амал келді – жыл келді» атты мәдени-көпшілік шара өтті. Ақсақалдар ақ батасын беріп, жас келіндер қонақтарға шашу шашты.

Барлық темір жол мекемелерінде де көрісу мерекесі дәстүр бойынша аталып өтіледі. Атырау жүк тасымалы және магистральдық желі бөлімшесі кәсіподақ комитетімен бірлесе көрісу салтын ұйымдастырды. Жұмыс аптасы басталар шақтағы таңғы 8-де дастархан жайылып, қымыз бен шұбат, бадана бауырсақ, сүзбе мен жент, т.б. тәттілер қойылды. Ұлттық киім киген қыз-жігіттер келушілерге дәм ұсынып, қызмет етті. Қызметкерлер, жан-жақтан желіден келген жұмысшылар бір-бірімен көрісіп, мәре-сәре болысты. Үлкендер жағы «Көрісу салты құтты болсын, жыл басымен», «Жылдан жылға аман жетейік!» деп баталарын берді. Желі бойындағы теміржолшылар да бұл мерекеден қалыс қалған емес. Аққыстау, Дина Нұрпейсова, Атырау, т.б. станциясының теміржолшылары жұмыста бәрі бір-бірімен қол алысып, төс қағыстырып көрісті.