АҚШ Транскаспий халықаралық дәлізі бойынша Қазақстанмен бірлесіп жұмыс істеуге ниетті
«Қазақстан теміржолшысы» газетінің тілшісі
Индустрия және инфрақұрылымдық даму министрлігінде Қазақстан мен АҚШ арасындағы өзара тиімді әріптестікті нығайту мен тиімді ынтымақтастықты арттырудың жолдары талқыланды.
Ведомство вице-министрі Динара Щеглова АҚШ-тың Оңтүстік және Орталық Азия елдері бойынша сауда өкілінің көмекшісі Брендан Линчпен кездесіп, пайдалы қазбаларды өндіру, геология және минералдық ресурстар саласындағы әріптестік, көлік және транзиттік қарым-қатынастарды сөз етті.
Д.Щеглова елімізде көлік-транзиттік әлеуетті дамыту мен көлік дәліздерін жаңғырту үшін ауқымды жұмыс атқарылып жатқанын атап өтті. Вице-министр Транскаспий халықаралық көлік бағытына, оның ішінде Ақтау портында контейнерлік хабты құру және Құрық портында «Саржа» көпфункционалды теңіз терминалының құрылысына ерекше тоқталды. Америкалық тарап өз кезегінде Қазақстандағы инфрақұрылымдық жобаларды іске асыруға, нақты айтқанда Транскаспий халықаралық көлік маршрутының жекелеген жобалары бойынша бірлесіп жұмыс істеуге ниетті екендерін білдірді.
Кездесу қорытындысына екі тарап та ризашылықтарын жеткізді. Қазақстан жағы мұхиттың арғы жағындағы алпауыт елмен байланысты нығайтуға қашан да мүдделі.