«Теміржол білгірлері» интеллектуалдық турнирі өтеді

«ҚТЖ» ҰК» АҚ Әлеуметтік саясат департаментінің ұйымдастыруымен «Теміржол білгірлері» интеллектуалдық турнирі өтеді. Осы сәуір айына жоспарланып отырған шараның мақсаты – интеллектуалды-шығармашылық, команда құрушы ойындарды ұйымдастыру арқылы корпоративтік мәдениетті нығайтып, теміржол зиялыларының ортасын қалыптастыру дейді ұйымдастырушылар.

– Турнирді өткізудегі басты міндет – компанияның корпоративтік құндылықтарын дәріптеу, қызметкерлердің шығармашылық және зияткерлік қабілеттерін дамыту, қызметкерлердің адалдығы мен ынтасын арттыру. «Теміржол білгірлері» интеллектуалдық турнирін 12 сәуірде Орталық аппарат қызметкерлері арасында оффлайн түрде бастағалы отырмыз, – дейді «Қазақстан темір жолы» ҰК» АҚ Әлеуметтік саясат департаментінің бас менеджері Ақмарал Байғабылова.  

Барлығы 4 турдан тұратын байқауға Орталық аппарат қызметкерлері оффлайн, ал филиалдар мен еншілес ұйымдар қызметкерлері онлайн түрде қатыса алады. Бірінші тур – қызықты деректер, екіншісі – байланыстыру, үшіншісі – бейне сауал, төртінші тур – логикалық сұрақтарға арналады. Іріктеу кезеңінде әр команда 5 адамнан құралады, жүргізуші сұрақтарды экранға шығарады және оларға түсініктеме береді. Сұрақ барлық командалар үшін бірдей болады. Жауаптарды командалар арнайы бланктерге толтырады және оны онлайн форматта қатысып жатса, ұйымдастырушыларға WhatsApp желісі арқылы жолдап, ал Оffline форматында отырса, қолма-қол тапсырады. Онлайн қатысатын еншілес ұйымдар мен филиалдардың қызметкерлерінде сапалы интернет желісіне қосылған ноутбук, компьютер болуы керек. Әрине, ең көп сұраққа жауап берген команда жеңіске жетеді.

Турнирдің ақтық сайысы Астанада өтеді. Соңғы сайыста Орталық аппарат, филиалдар және еншілес ұйымдар қызметкерлері арасындағы іріктеу турларының нәтижесі есепке алынады. Командалар үшін сұрақтар экранға беріліп, жинаған балдар саны да экранда шығып тұрады. Шешуші турнир 2 сағаттың ішінде өткізіледі. Соңында жеңімпаз командалар марапатталып, диплом және арнайы сыйлықтарға ие болады.