Никотин емес, витамин қажет!
Атырау облысы бойынша меншікті тілші
Дені саудың, жаны сау. «Бірінші байлық – денсаулық» екенін әр уақыт есте ұстайтын жан бұл сөздің мағынасын жақсы түсінеді.
7 сәуір – Дүниежүзілік денсаулық сақтау күніне орай Атырау жүк тасымалы бөлімшесінде кәсіподақ ұйымының ұйымдастыруымен «Никотинді витаминге айырбастаймыз» атты акция өтіп, теміржолшылардың денсаулығын жақсартуға көңіл бөлінді. Яғни шылым қорабын тапсырғандарға орнына жоғары сортты алма берілді. Оның астарында «ағзаңыз дәрумендерге бай болсын» деген тілек жатқаны анық. Әрине адам зиянды әдеттен әп сәтте арылып кетпеуі де мүмкін, дегенмен ой тастау да қажет.
«Жұмыс орныма бір топ адам кіріп келгенде абдырап қалғанымыз рас. Бірақ пайдалы акция екен. Адамға ой салып, никотиннен витаминнің пайдасы зор екенін ескертеді. Денсаулықты бағалау мақсатындағы мұндай шараның маңызы зор», – дейді бір қорап темекісін тәтті алмаға айырбастаған теміржолшы жігіт.
