Жамбылдық теміржолшылар соғыс ардагерлерін құттықтады
Тараз қаласы бойынша меншікті тілші
Бүгінде Жамбыл облысында 17 ардагер-майдангер бар. Оның біреуі теміржолшы. Ұлы Жеңістің 78 жылдығына орай Жамбыл бөлімшесі директорының экономикалық мәселелер бойынша орынбасары Дәурен Құрманов бастап, бөлімше кәсіподақ ұйымының төрағасы Серік Ақшораев, кадрлар бөлімінің басшысы Меруерт Бейсенбекқызы жасы жүзге қараған майдангер-теміржолшы Базарбай Бүрбаевты құттықтады. Арнайы сый-сияпатын ұсынып, қарияның батасын алды.
Базарбай Бүрбаев 1942 жылы әскерге шақырылып, 393 атқыштар полкінде минометші болған. Ол Манчжурия, Мугден, Харбин қалаларын азат етуге қатысқан. Кеудесіне "Қызыл жұлдыз" орденін, "Ерлігі мен қайсарлығы үшін", "Жапонияны жеңгені үшін" медальдарін қадаған жауынгер 1947 жылы елге оралады. Содан 1988 жылы зейнетке шыққанға дейін Жамбыл локомотив пайдалану депосында машинист болады. Бүгінде немере, шөберелерінің қызығын қызықтап отыр.
Сондай-ақ, жамбылдық теміржолшылар жергілікті әкімдік бекіткен ардагер-майдангер Иван Макеевтің де шаңырағына кіріп құттықтап қайтты.