Вагон паркі үздіксіз жаңаруда

Жолаушылар вагоны паркін жаңарту мәселесі қашан да қоғам назарында. «Жолаушылар тасымалы» АҚ вагон паркін жыл сайын кезең-кезеңмен жаңарту жоспарын түзіп, соған сай жұмыс жүргізуде. Алдағы уақытта отандық нарық швейцариялық Штадлер компаниясының технологиясы бойынша жасалған вагондармен толығады.

Бүгінгі таңда Ұлттық тасымалдаушы компанияның вагондар паркінде 2100-ден астам вагон бар болса, оның 1269-ын стандарт вагондар құрайды, бұл – барлық вагондардың 60 пайызы. Сонымен қатар 732 Тальго вагоны және 108 электро-дизель вагоны қолданыста.  

Компанияның бас директоры Жәнібек Тайжановтың айтуынша, осы вагондардың ішінде 1660 вагон, яғни 78 пайызы ауа желдеткіш жүйесімен қамтамасыз етілген. 1204 вагонда биоәжетхана бар. 80 купе вагонда мүмкіндігі шектеулі жандар үшін жағдай жасалған. 2025 жылға қарай әлеуметтік маңызды бағдарларды қимыл-қозғалысы шектеулі жолаушыларға арналған вагондармен 100 пайыз қамтамасыз ету көзделуде. Биыл жыл соңына дейін 13 вагон күрделі жөндеумен қайта жабдықталмақ. Ал 2023-2024 жылдары ерекше жандар үшін 11 купе вагон, ал 2025-2030 жылдар аралығында 35 купе вагон сатып алу көзделуде.  

– Компанияда тазалық пен төсек жабдықтарына қатысты жаңа стандарттар қабылданған, яғни вагондарды тазалау нормативтері қайта қарастырылып, жолаушы пойыздарындағы санитарлық-гигиеналық құралдармен қамтамасыз ету, клининг бойынша жаңа стандарттар әзірленді. 2019 жылдан бастап жолаушыларға жоғары сапалы төсек жабдықтары беріледі. Олар сапасы жоғары матадан жаңа стандарттарға сай тігілген. Жолаушылар жайлылығына бағытталған жұмыстардың нәтижесінде жұмыста клиентке бағдарлану үлесі артты, – дейді бас директор.  

Айтуынша, бүгінгі таңда жалпы парктің 32 пайыз вагондарының мерзімі 20 жылдан асқан. Парктің орташа тозу деңгейі 45,5 пайызды құрайды. Жыл сайын парктен қызмет көрсету мерзімі өткен вагондар шығарылады, 2030 жылға дейін 800-ден астам вагонды есептен шығару жоспарланған. Сондықтан олардың орнын жаңалары басады. 2010-2023 жылдар аралығында компанияның жолаушылар вагоны 50 пайызға жаңарған, бұл – 1236 вагон. Биылдан бастап 2030 жылға дейін вагон паркін жаңарту бойынша қарқынды жұмыстар жүргізілмек. Атап айтқанда, ағымдағы жылы вагон паркі 100 жаңа вагонмен толықпақ, 2025 жылға дейін 207 вагонға қол жеткізу, ал стратегиялық ынтымақтастық туралы келісім аясында Штадлер технологиясы бойынша 537 жаңа жолаушылар вагонын алу көзделіп отыр.