Балташевтар әулетінің лайықты ізбасары

Жаңалықтар

14.04.2017, 15:06

Аягөз өңірінде есімдері күллі республикаға әйгілі теміржолшылар шыққан династиялар көп. Балташевтар әулеті солардың бірі. Түп негізін Түрксібтен қалаған династия өкілдерінің қазіргі таңда төртінші буыны желі бойында еңбек етуде. Сала көнекөздерінің көзін көрген, қызметтік тәрбиесінде болып, тәлімін терген, бүгінде аға буын арасында озық қызметімен үлгі болып жүрген білікті мамандардың бірі Аягөз станциясы кезекшілігінің операторы Майра Балташева осы әулеттің өкілі. Майра Жұмағалиқызының теміржолда қызмет атқарып жүргеніне биыл аттай 33 жыл болыпты. Желі бойында 40 жылдан аса еңбек еткен әкесінің өсиетімен осы салаға келген екен. Аға-інілері де түгел теміржолшылар. Әулеттің ең кіші буыны Аягөз локомотив пайдалану депосында машинист. –Біздің династияның барлық мүшелеріне тән қасиет тек бір ғана мекемеде 40 жылдан аса қызмет атқару екен. Менің де еңбек өтілім осылай өрбуде. Алғаш станция кезекшілігіне келгенде ерекше қуанғаным есімде қалыпты. Содан бері бұл жауапты міндет өмірімнің өзегіне айналды, – дейді Майра Жұмағалиқызы. Аягөз станциясы қашан да қарбаласқа толы. Қос тараптағы диспетчерлерге тиісті жауап қайтару, ахуалға байланысты өкім беру, пойыздардың келу-кету тәртібін бақылау, тіркеу, машинистерді ескертулермен құлақтандыру сынды аса жауапты жұмыстардың ортасында жаңылыспай жұмыс істеудің өзі оңай емесі белгілі. Қызметтік үстелінің қарсы бетіндегі микротаблоға қарап отырып, вагон айналымын алақандағыдай бақылауда ұстап, станция ғана емес, вокзал мен ТЧЭ-25, бөлімшемен де тығыз байланыс жасап отырған Майра Жұмағалиқызының сабырлы да салқынқанды қимыл-қозғалысына қарап, «темірдей төзімді теміржолшылар» деген осындай-ақ шығар деген ой келеді еріксіз... Осы жайлы мінезі мен бауырмал қасиеті үшін басшылық көбінесе жас мамандарға тәлімгерлікке бірден Майраны ұсынады екен. Бұл ретте осынау жылдар аралығында Майра Жұмағалиқызының ақыл-кеңесін алған теміржолшылар легі жетерлік. –Алдыңғы толқын өкілдерінің бай тәжірибесінен өнеге алу, тіпті, болмағанда теміржол тақырыбында мәслихат құрудың өзіндік ғанибеті бар. Бұл ретте біздің станциямызда әйгілі династия өкілдері, қызметтік салада өмірден көрген-түйгендері жетерлік мамандар баршылық. Солардың арасында еңбек жолы отыз жылдан енді асса да Майра Жұмағалиқызын кейінгі толқын өкілдері өнеге көзі тұтады. Өйткені ол Балташевтар әулетінің лайықты ізбасары, – дейді Аягөз станциясының бастығы Қуаныш Әміренов.

Балташевтар әулетінің лайықты ізбасары

Басқа да жаңалықтар

«Қазақстан теміржолшысы» газеті, №99 22 қараша 2024 жыл