ҚТЖ желісі бойынша жүк айналымы төрт айда 9,6%-ке өсті
2023 жылдың қаңтар-сәуір айының қорытындысы бойынша ҚТЖ желісінде жүк тасымалдау 82,4 млн тоннаны құрады. Ел ішінде тасымалданғаны – 52,8 млн тонна. Экспортқа 29,6 млн тонна жөнелтілді, деп хабарлайды Rail-news.kz.
4 айда 36,7 млн тонна тас көмір тасымалданды. Оның ішінде қазақстандық тұтынушыларға жеткізілген қатты отын – 26 млн тонна. Экспортқа 10,7 млн тоннасы шығарылды.
Астық тасымалдау көлемі 16,3%-ке өсіп, шамамен 4 млн тоннаны құрады. Астық экспорты 16%-ке, яғни 3,2 млн тоннаға дейін өсті. Ұнтақ өнімдерін тасымалдау 20,4%-ке дейін, яғни 1,2 млн тоннаға дейін артып отыр.
2023 жылғы қаңтар-сәуірде мұнай жүктерін тасымалдау 2022 жылғы көрсеткішке қарағанда 3,3%-ке, 6 млн тоннаға дейін, құрылыс жүктерін 9,6%-ке, 4 млн тоннаға дейін, химиялық тыңайтқыштарды 10%-ке, 1,5 млн тоннаға дейін ұлғайды.
Пайдалану жүк айналымы өткен жылдың сәйкес кезеңімен салыстырғанда 9,6%-ке өсіп, 89,4 млрд т-км неттоны құрады.