Жұмыла көтерген жүк жеңіл

Жаңалықтар

18.04.2017, 10:18

Өткен аптада Семей Жүк тасымалы бөлімшесіне қарасты Талды станциясының су құрсауында қалғанын айтқан болатынбыз. Демалыс күндері бөлімше басшысы Марлен Көкірекбаев бастаған теміржол басшылары Талдыға тағы барып, зардап шеккен тұрғындарға гуманитарлық көмек көрсетті. Көктемгі еріген қар суының бетін қайтаруға алғашқы сәттен бастап жұдырықтай жұмылған семейлік теміржолшылар қауіптің бетін қайтарғанмен, жиналған көлшік су әлі кеткен жоқ. Бірақ су құрсауында қалған Талды елді-мекенінің тұрғындары, бастарына түскен қиыншылықпен жалғыз күресіп жатқан жоқ. Апатты жағдай орын алғалы теміржол басшыларының жарғақ құлақтары жастыққа тимей, оқиға орнында жүргені өз алдына, енді теміржолшылар, кәсіподақ өкілдерімен бірге қызыл су басқан Талды ауылдық округінің тұрғындарына азық-түлікпен көмек көрсетуді жөн көрген. Гуманитарлық көмек, қайырымдылық акциясына қатысуға ниет білдірген Жаңасемей жол дистанциясының АСК көлігімен Талдыға жеткізілді. Бұл жолы Талдының жағдайын көзбен көріп, жергілікті халықпен жүздесуге Семей қаласының әкімі Ермак Сәлімов та келді. Теміржол басшылығы, Марлен Көкірекбаевпен бірге магистральді желі бөлімшесінің директоры Айдын Шәукежанов, салалық кәсіподақ ұйымы орталық кеңесінің Семей аймағындағы өкілі Алик Досановтар қала әкіміне жағдайды таныстырды. – «Жұмыла көтерген жүк жеңіл» деген, біз тасқын судан зардап шегіп отырған талдылық әріптестерімізді далада қалдырмай, қысылтаяң шақта қолдан келген қолдау-көмекті беріп жатырмыз. Балалар сабақтарын жалғастырып, үлкен-кіші өз тірліктерімен айналысуда, әйтсе де іргеге дейін келген су қолайсыздық туғызып, бірқатар қиындықтар көрсетіп, қатынас шектеліп отырғаны белгілі. Сондықтан, кәсіподақпен бірлесіп бүгін қажетті азық-түлік алып келдік, – деген бөлімше басшысы теміржолшылар қандай қиын қыстауда да жалғыз еместерін сезінуі қажет деп санайтынын жеткізді. Теміржолшылар атынан көрсетілген гуманитарлық көмек су апатынан зардап шеккен 85-мүшесі бар 16 отбасына теңдей таратылып берілді. Өз кезегінде қала әкімі Ермак Бидахметұлы көрсетілген көмек үшін барлық талдылықтардың атынан теміржолшыларға алғыс білдірді.

Жұмыла көтерген жүк жеңіл

Басқа да жаңалықтар

Қазақстан теміржолшысы газеті, №46 16 маусым 2026 жыл