Жазғы жұмыстарға бағдар

Жаңалықтар

18.04.2017, 11:30

Семей жүк тасымалы бөлімшесі бойынша жыл басынан бергі өткізілген аса ауқымды науқандық шара – көктемгі байқау мәреге жетті. Ақтоғай – Аягөз телімі бойынша басталған маусымдық сын өңірдегі ең ірі тораптық Семей және Жаңасемей станцияларынан аяқталды. Ағымдағы байқау желі бойында нәтижелі жұмыс жүргізілгенін айғақтауда. Яғни, қыстан тосын жағдайларсыз шыққан теміржол мекемелері мен нысандары жазғы мезгілдегі жүргізілуі тиіс межелі шараларға толық даяр. Сонымен қатар, жол шаруашылығы мен өзге де мекемелерді материалдық тұрғыдан қамту және алдағы жөндеу жұмыстарын жүргізу бойынша да жұмыстар пысықталды. Бүгінгі күні мәлім болғандай, желі бойындағы станцияларда шаруашылықтар бойынша айтарлықтай ақаулықтар орын алмаған. Әрине, бірқатар сын-ескертулер тіркелген. Осыған дейінгі ауыстырылған бағыттамалы бұрмалардың сапасы жақсы. Сонымен қатар бірқатар шақырымдардағы жолдың балдық бағалауы да қанағаттанарлық деңгейде. Әйтсе де, биылғы жаздағы жүргізілетін жұмыстар қатары осы тексеру нәтижесінде белгілі болады. Ал, теміржол ғимараттары мен нысандарының күтімі, ішкі-сыртқы әрленуі, санитарлық тазалығы, сала мамандарының жұмыс орнының реттілігі байқау қарсаңында қауырт жүргізіліпті. Толықтай талапқа сай. –Толықтай алғанда, телімдер бойынша жол айрықтары мен станциялардың барлығы да қыстан ауыртпашылықсыз шықты. Ал, алдағы міндет, жазғы жұмыстарды ойдағыдай жүргізіп, келер қысқа даярлық шараларын іркіліссіз жүргізіп, шаруашылықты күшейту. Сонымен қатар, қозғалыс қауіпсіздігін сақтаудағы кәсіби біліктілікті шыңдай түсу, – дейді желі бойын шарлап, тексеру шараларын жүргізген өндірістік-техникалық бөлімнің мамандары. Құжат жүзіндегі нақты нәтижеге келер болсақ, шаруашылықтар бойынша ревизорлар жан-жақты тексерістен соң арнайы қорытынды жасайтын болады. Яғни, биылғы ерте қолға алынған көктемгі байқаудың нәтижесі мамыр айының орта шеніне дейін толық анықталып, тиісті шаралар қабылданатын болады.

Жазғы жұмыстарға бағдар

Басқа да жаңалықтар

Қазақстан теміржолшысы газеті, №102 09 желтоқсан 2025 жыл