Дала өрті жолшылар күшімен сөндірілді
Ақтөбе облысы бойынша меншікті тілші
Ақтөбе аймағында маусым айы басталғалы ауа температурасы өте жоғары, 30°-35° ыстық болып тұр. Теміржолдағы өрт сөндіру қызметі тілсіз жаудың тұтану қаупінің алдын алып, теміржол бойын жырту, сақтандыру жұмыстарын жүргізіп келеді.
Жуырда Әйтеке би ауданы Жоса станциясы маңында далалық өрт орын алды. Теміржолдан бір шақырым жерде тұтанған өрт Никельтау жол дистанциясының бастығы Қайрат Тәңірбергеновтің басқаруымен, жолшылар күшімен сөндірілді.
«Тілсіз жау сол жерде еңбек етіп жатқан жолшылардың дер кезінде қимылдаған қажырлы еңбегі арқасында толықтай ауыздықталды. Өртті сөндіргеннен алдын алған жеңіл. Сондықтан теміржол бойымен шекаралас аудандардың басшыларына, кәсіпкерлерге, жеке қожалықтарға қызметтік хаттар жолдап, өрт қауіпсіздігін сақтауды және төтенше жағдай бола қойған жағдайда тез әрекет ету хабарлануда. Егін ору, шөп шабу науқаны кезінде аудандарды тағы аралап шығамыз», – деді Ақтөбе мемлекеттік емес өртке қарсы қызметінің бастығы Әділ Құбаев.
Аймақта 14 маусым мен 14 шілде аралығында өрт қауіпсіздігі айлығы өтіп жатыр. Өртке қарсы қызмет мамандары қауіптің алдын алып, кемшіліктерді уақытында түзетіп отыруға шақырады. Ақтөбе бөлімшесіне қарасты 1800 шақырымға жуық теміржол мен оның бойындағы жүздеген нысандардың өрт қауіпсіздігін небәрі 7 адам бақылайды. Әділ Құбаевтың айтуынша, қиындық жоқ емес. Әсіресе техника тапшылығы бар.
«Қызметтік көлік болмағаннан кейін жолаушы немесе жүк пойыздарына мінуге тура келеді. Нақты тексеріп шығатын жерге тез жету мүмкін емес екендігі белгілі. Десек те, жалақысы аз, жауапкершілігі керісінше көп жұмыста алды 35 жыл, арты 15 жыл еңбек етіп келе жатқан жанкештілер біздің ұжымда», – дейді Әділ Құбаев.