«ISKRATEL» құрылғысы қолданысқа дайын

Жаңалықтар

03.05.2017, 10:28

Теміржолдың сигнализация саласы тағы бір жаңа құрылғымен толықпақ. Заманауи, сандық технологияның байланыс жүйесі «Iskratel» құрылғысы жақын күндерде Қызылорда белгі беру және байланыс дистанциясында өндіріске енгізіледі деп күтілуде. «Iskratel» шешімі іс жүзінде тәжірибеден өтіп, сыналған SI2000/SI3000 операторлық класындағы платформаларда орналастырылған заманауи құрылғы болып табылады. Қазіргі таңда дистанцияның байланыс саласы бойынша телім бастығы Бижан Сәдиев пен өндірістік оқыту шебері Жамбыл Жаманбаев және аға механик Темірхан Дүйсенбаев бастаған топ жаңа технология жабдығын тәжірибе жүзінде сынап, сараптау, жұмысқа дайындығын саралау шараларын жүргізуде. Жалпы белгі беру-байланыс саласының телімі басшысы болсын, механиктер болсын, еңбек өтілі кемі он жылдан асқан, кейбірі қырық жылдан астам жұмыс жасап келе жатқан тәжірибелі теміржолшылар. –Искрателдің бұған дейін қолданыста болған құрылғылардан ерекшелігі: оның жабдықтарының жинақылығы, байланыс саласындағы заманауи бәсекелестерінен жұмысқа қабілеттілігінің басымдығы, барлық жұмыс ағынының автоматтандырылған жүйемен жабдықталуы және басқарылуы секілді өзіндік ерекшеліктерге толы болуы. Бұған дейін «байланыс каналдарын» қолмен байланыстырып, механикалы түрде қосып-ажыратып жұмыс жасайтын байланысшы-механиктер ендігі жерде автоматты құрылғының жұмысын компьютер арқылы бақылап отыратын болады, бүгінгі таңда сынақ жұмыстары аяқталып, құрылғы қолданысқа берілуге дайын, – дейді жаңа құрылғыны жұмыс бабына дайындау шараларын жүргізіп жатқан мамандардың бірі, телім бастығы Бижан Сәдиев. Осыған дейін дистанцияда «Лампалы әуе желісі байланысы» 1989 жылдарға дейін қолданылса, онан кейінгі уақытта ол құрылғыға қарағанда жетілдірілген «К-60П» байланыс-шкафы жабдықтары өндіріске еніп, жұмыс жасап келген болатын. Енді су жаңа сандық жүйедегі ІР технологиямен жабдықталған әрі оптикалық-талшықты байланыс жүйесімен жұмыс жасауға негізделген заманауи байланыс құрылғысы «Iskratel» дистанция тіршілігіне тың серпін бергелі тұр.

«ISKRATEL» құрылғысы қолданысқа дайын

Басқа да жаңалықтар

Қазақстан теміржолшысы газеті, №97 21 қараша 2025 жыл