Елімізге теміржол көлігімен бидай импорттауға тыйым салынды
Ауыл шаруашылығы министрі Айдарбек Сапаров «ҚР аумағына автомобиль және теміржол көлігімен бидай әкелуге тыйым салуды енгізу туралы» бұйрыққа қол қойды. Бұл туралы ҚазАқпарат хабарлады.
«6 ай (Еуразиялық экономикалық одақтың сыртқы экономикалық қызметінің тауар номенклатуралық коды: 100119; 100199) мерзімге: Қазақстан Республикасының аумағына үшінші елдерден және Еуразиялық экономикалық одақ елдерінен автомобиль көлігімен; лицензияланған элеваторлардың, астық өңдеушілердің, құс шаруашылығы кәсіпорындарының атына темір жол көлігімен бидай әкелуді қоспағанда, Қазақстан Республикасының аумағына үшінші елдерден және Еуразиялық экономикалық одақ елдерінен темір жол көлігімен бидай әкелуге тыйым салу енгізілсін», - делінген министр Айдарбек Сапаров қол қойған бұйрықта.
Шектеу алғаш ресми жарияланған күннен, яғни 26 қыркүйектен бастап күшіне енеді. Тек бұйрықтың 1-тармағының екінші абзацы 11 қазаннан бастап қолданысқа енгізіледі.