Астанада «Көлік және логистика» тақырыбында V халықаралық конференция өтіп жатыр
Отандық көлік апталығы аясында ұйымдастырылып отырған шарада сарапшылар мен қатысушылар көлік жүйелерінің ынтымақтастығы мен интеграциясы, орта дәліз бағытын дамыту, сондай-ақ мультимодальды тасымалдау саласындағы жаңа технологиялар мен инновациялар, жүктерді тасымалдау тиімділігін арттыру және жеткізу жағдайларын жақсарту мәселелерін талқылауда.
Конференция аясында «TransLogistica Kazakhstan-2023» көрмесі ұйымдастырылған. Көрмеде Әзербайжан, Беларусь, Германия, Иран, Италия, ҚХР, Қырғызстан, Литва, Латвия, Польша, Ресей, Түрікменстан, Түркия, Өзбекстан, Финляндия, Эстониядан 200-ден астам компания өз стендтерін ұсынды.
Осы орайда Қазақстан Азия мен Еуропа арасындағы негізгі транзиттік орталық ретіндегі өз ұстанымын нығайтып келе жатқандығын айта кеткен орынды. Қатысушылар саны өткен жылмен салыстырғанда 40%-ға жуық артқан.
Көрмені ұйымдастыру барысындағы тағы бір ерекшелік – Германия, Қытай және Түркиядан қатысып жатқан компаниялардың көп болуы. Сондай-ақ «TLO GmbH Internationale Spedition» (Германия), «ATTRADING» (Польша), «Logitrans Lojistik A. S.», «Gurkan Nakliyat», Destan Transport» (Түркия) және басқа да компаниялар өз стендтерін алғаш рет ұсынып отыр.
Отандық компаниялардың қатысу көрсеткіші шамамен 40 пайызды құрайды. «Қазақстан Темір жолының» құрамына кіретін компаниялар үлкен ұжымдық стендімен 2023 жылғы экспозицияның сән-салтанатын одан әрі аша түсті.