ҚТЖ жастардың дамуына жағдай жасап отыр

Елордада «ҚТЖ» ҰК» АҚ-ның ХІІ республикалық жастар форумы өтіп жатыр. Оған еліміздің барлық өңірлерінен ең белсенді және талантты деген 250 қатысушы жиналды. 

Жастар форумын жыл сайын «ҚТЖ» ҰК» АҚ әлеуметтік саясат департаменті ұйымдастырып келеді. Форумның негізгі міндеттері – жас қызметкерлердің зияткерлік әлеуетін көтеру, оларды басым міндеттерді шешуге тарту, сондай-ақ кәсіби, әлеуметтік және мәдени байланыстарды нығайту.

Форумға «100 жас есім», «Жас үздік маман» байқауының қатысушылары, Президент жанындағы Компанияның жастар ісі жөніндегі кеңесі, «ҚТЖ Лигасы» КВН ойындарының финалистері, «Корпоративтік волонтерлік мектебі» байқауының қатысушылары және тағы басқа ұйым жастары қатысты.

Пайдалы форум барысында жастардың біліктілігін арттыратын және жеке бренд ретінде қалыптасуына жағдай жасайтын түрлі тақырыпта тренингтер мен шеберлік сағаттары өтті.

Бизнес тренер әрі сарапшы Мақсат Жансейітов «ҚТЖ Лигасы» КВН ойындарының финалистері мен Президент жанындағы Компанияның жастар ісі жөніндегі кеңесіне арнап «Қоғамдық орында сөйлеу» тақырыбында тренинг өткізді. Форумға қатысып жатқан бұл талантты жастар келешектегі басқарушы мамандар. Сондықтан жастардың жеке біліктілігін арттыру, кез келген жағдайға бейімделе білудің маңыздылығы айтылды. Сондай-ақ ол жастарға өз презентациясын қалай тиімді жасау керек деген мәселеге тоқталып, кеңінен баяндады.  

Тренинг барысында теориялық біліммен қатар тәжірибелік сабақтар да болды, жастар түрлі тапсырмаларды шешу арқылы өз білімдерін шыңдай түсті.  

Тренер Мақсат Жансейітов персоналдың өз біліктілігін арттыру бойынша жұмыс істейді. Әсіресе кадр резервін дайындау, сондай-ақ мамандарды жұмысқа қабылдауда іріктеу  жүргізу мәселесі бойынша көмек көрсетеді. Сарапшы «ҚТЖ» ҰК» АҚ жастардың біліктілігін арттыруға, мықты маман ретінде өздерін дамыта түсуіне жақсы жағдай жасап отырғанын айтады.

«Теміржолшылармен осымен алтыншы жыл жұмыс істеп отырмын. Барлығы жалындап тұрған жастар, оған қоса көпшілігі өндірісте істейтіні қуантады. Кейбірі өндірісте істеп жүрген жерінен сатылап өсіп жатыр. ҚТЖ жастардың өсуіне жағдай жасап отырғанын атап өту керек. Жыл сайын өткізілетін «100 жас есім» сияқты бағдарламалар жастардың алға ұмтылуына үлкен қолдау болып отыр», – дейді М.Жансейітов.  

Сондай-ақ форум барысында жастарға тиімді басқарудың әдіс-тәсілдері бойынша тренинг өткізілді. Тренер Айжан Қиманова жастарға өз ісін тиімді жоспарлай білудің қыр-сырын үйретті. Айжан Қиманова – өндірісті жоспарлау жобасының авторы. Ол жастарға жұмыс жоспарын құрудың маңыздылығы бойынша мағлұмат беріп, 12 аптаға жоспар құра білудің тиімділігі жайлы айтты.

«Қазір жоспарды 12 айға емес, 12 аптаға деп құрған дұрыс. Өйткені айналамызда бәрі жылдам өзгеріп жатыр, сондықтан оның барлығына тез бейімделе білуіміз маңызды. Бүгін жастарға жетістікке жету, мақсатына тез қол жеткізудің жолы бойынша айтып бердім. Әлем халқының 3-5% ғана алдағы уақытқа жоспар құрады екен. Сол адамдар жетістікке тез жетіп жатыр. Егер халықтың көбі жұмысын дұрыс құрып, жоспарлай білсе, ҚТЖ, жалпы еліміз дами түсер еді. Сондықтан жоспарлай білу жетістікке жетуде басты рөл атқарады», – дейді тренер.

«Корпоративтік волонтерлік мектебінің» мүшесі Мирас Бошаев Қарағанды облысынан келіпті. Биылдан бастап волонтерлікпен айналысады. Негізі Ағадырда электровоз машинисі болып жұмыс істейді. Қолы бос кезінде волонтерлікпен айналысатын жас маман бұл форумның өте пайдалы болғанын айтады.

«Жастар форумынан мотивацияға толы көптеген пайдалы кеңестер алдық. Негізінен адам ашылып, өзін жан-жақты тани білуі керек екенін түсініп жатырмын.  Теміржолшы болған соң жүрген жеріңде теміржол саласы жайлы көбірек мағлұмат беріп, айтып отырудың маңыздылығын түсініп жатырмын. Біз жұмысымыз жайлы көп айтпайды екенбіз, негізі білетініңді өзгелерге де айтып отырған жөн екен. Өзіме волонтерлікпен айналысқан ұнайды. Бұған дейін сыныптастарыммен қайырымдылық қорында жұмыс істедім», – дейді жас маман.