Бәсеке бастауы білімде

Жаңалықтар

25.05.2017, 21:21

Мамырдың 10 мен 25 аралығында Семей жүк тасымалы бөлімшесінде білікті мен білімділер сайысы өтті. Онда теміржолшылардың ПТЭ - техникалық пайдалану ережелері, ИДП – пойыздар қозғалысы мен маневрлік жұмыс жөніндегі нұсқаулық, ИСИ – сигнал беру жөніндегі нұсқаулық талаптарын білу деңгейлері сынға түсті. Бұл өзара пікір алмасуға, білімді шыңдауға, шығармашылық қатынастарға толы жарты ай болды. Бөлімшенің өндірістік оқыту нұсқаушысы Жанар Ерғасенова Семей, Жаңасемей, Аягөз, Шар, Дегелең станцияларының теміржолшыларын қамти отырып сайыс өткізудің кестесін түзген. Болат жол мамандары үш конкурстық талап бойынша бақтарын сынап, атқарып жүрген міндеттеріне сай білім жарыстырды. Мамыр айының 10 жұлдызында Семей станциясында бөлімшенің өндірістік - техникалық бөлімінің бастығы Гүлнәр Төлеуханова шымылдығын түрген білімділер бәсекесі кестеге сай айдың 22-23 күндері Семей вагон пайдалану депосында өтті. Сайыстың бірінші күні аға вагон қараушы Рауан Бұзаухаевтың ауысымындағы «Тапқырлар» тобы мен аға вагон қараушы Бекболат Мұстафин жетекшілік ететін «Қырандар» командасы бақ сынасты. Талапқа сай бірыңғай киім киген командалар сұрақ-жауап сайысында салалық ережелерге қатысы білім-біліктерін көрсетуге тырысты. «Үй тапсырмасы» кезеңінде түрлі өнерлерін көрсеткен екі жақ та қаражаяу еместерін танытты. Білімділер бәсекесінің бірінші күнін қорытындылаған төрешілер «Қырандар» тобы 120, «Тапқырлар» тобы 100 балл алғанын жария етті. Теміржолшылардың екінші күнгі теке-тірестері де қызықпен, тартысқа толы болды. Бұл күні Мейрам Өтелбеков басқаратын «Ұландар» мен Жұмабек Бекбосыновтың «Алғырлар» тобы жарыс көрігін қыздырды. Әділ қазылар алқасы сайыстың алғашқы турының нәтижесі бойынша жалпы дайындықтың жаман еместігін атай отырып, бірыңғай киім үлгісін сақтамаған «Ұландар» тобына ескерту жасап, ұпай сандарын шегергендерін айтты. Сұрақ-жауап кезеңінде «Ұландар» сапынан Андрей Подпорин, Жәнібек Құрамысов, «Алғырлар» қатарынан Сәуле Алпысбекова, Асқар Құрымбаевтар білім деңгейлерінің жоғары екендігін байқатты. Екі күнге созылған білім сайысының қорытындысында қазылар алқасының шешімімен 1-орын 120 ұпай жинаған «Қырандар», 2-орын 119 балл алған «Алғырлар» тобына бұйырды, ал 3-орынды «Ұландар» мен «Тапқырлар» бөлісті. Қатысушылар Мақтау қағаздары мен ескерткіш сыйлықтармен марапатталды. Дәл осындай сайыс Семей станциясында да өтті. Онда 4 топ қатысып өнерлерін ортаға салды. 1-орынды «Три богатыря» командасы иеленсе, екінші сатыдан «Стрелка», ал «Магистраль» компандасы үшінші орыннан көрінді. –Аталмыш сайысқа бүгінгі күнге дейін он үш мекемеден 200-ден астам теміржолшы қатысты. Мұнда талай жаңа таланттың жолы ашылып, бөлімшенің кадрлық резерві болашағы зор, мүмкіндігі мол, өскелең буынмен толыға түсті, – дейді бөлімшенің өндірістік оқыту нұсқаушысы Жанар Рахымбердіқызы. Ал маусым айында бөлімше бойынша жарысқа қатысушы мекемелердің арасында ақтық сайыс өтіп, онда «Үздік техникалық кабинет», «Үздік бейнефильм» сайыстарының нәтижесі шығарылмақ.

Бәсеке бастауы білімде

Басқа да жаңалықтар