Теміржолшы туралы ән туды

Жаңалықтар

30.05.2017, 18:50

Оқуға 2 мин

Болашақ теміржолшылар даярлайтын Ақтөбе көлік, коммуникация және жаңа технологиялар колледжінің оқытушысы Амангелді Мырзалиев «Теміржолшы мамандар» атты әннің тұсауын кесті. Амангелдінің өзі де осы оқу орнын «Тасымалды ұйымдастыру және қозғалысты басқару» мамандығы бойынша тәмамдаған. Сосын жоғары оқу орнын бітірген. Теміржолшылар өмірімен жақсы таныс. Оған әншілік қасиет әкесінен дарыса керек. Қызылорда облысының Арал ауданында туып-өскен жігіттің әкесі кезінде жақсы музыкант болған, Алматыда «Жігер» фестиваліне қатысып, лауреат та атанған екен. –Алайда, әкем өнерін әрі қарай дамытуға мүмкіндік таппай, бауырларына қарайласып, отбасылық себептермен ауылда қалыпты. Есесіне, біз, балалары, мектеп жасымыздан ән салып, музыкаға әуес болып өстік, – дейді Амангелді. Теміржолшылар туралы әннің туу тарихына келсек, бірде Ақылбек Жеменейдің мұнайшыларға арнаған әнін естіп, неліктен теміржолшылар туралы ән жазбасқа деген ой мазалаған автор былтырғы жылы музыкасын жазып, нотаға түсіріпті. –Алайда, құрғақтай орындай салмайсың ғой. Сондықтан, Алматыға барып таныс жігіттерге аранжировкасын жасаттым. Сөйтіп жүргенде көктем болды. Санаулы күн бұрын колледждегі концерттердің бірінде алғаш рет орындадым. Әріптестерім жақсы қабылдады. Сазды, ырғақты, теміржолға қатысты шараларда орындауға болатын ән деп баға берді, – дейді Амангелді. Бүгінде Амангелдініңқоржынында бірнеше ән бар. Ақтөбенің мерейтойына арнап жазған әнін де жұртшылық жылы қабылдады. Жас жігіт махаббат, сезім тақырыптағы әндерден гөрі отан, ел, мамандыққа қатысты патриоттық сипаттағы туындыларды ұнататын көрінеді. Бірнеше әнін интернеттен жүктеп алуға болады.

Теміржолшы туралы ән туды

Басқа да жаңалықтар

Қазір оқылуда

Қазақстан теміржолшысы газеті, №79 06 қазан 2026 жыл