Еліміздегі Stadler жолаушылар вагонының өндірісі қарқын алуда
Қазақстанда Stadler жолаушылар вагоны өндірісін локализациялау процесі жалғасуда, деп хабарлайды Rail-news.kz.
Жолаушылар тасымалы компаниясымен ұсынылған жоспар кестесі шетелдік өндірістің елімізде шоғырланып, жылдам қалыптасуын белгілеп берді.
2022 жылы «Қазақстан темір жолы» (ҚТЖ) Stadler компаниясына 537 вагонға тапсырыс берді, соның аясында «Тұлпар» зауыты олардың бақылауына өткен болатын.
Алғашқы жеткізілімдер 2025 жылға жоспарланған, қазір өндіріс орнының шоғырлану деңгейі 9,4%, ол 2029 жылға қарай 35,2% жетуі тиіс.
Stadler әлеуетті жеткізушілер тізіміне Қазақстанның 30-дан астам компаниясын қосты, сонымен қатар француздық Constellium компаниясымен алюминий корпустарын шығару бойынша келіссөздер жүргізуде.
Бұл қадамдар еліміздің жергілікті өндірісті дамытуға және жаңа жұмыс орындарын құруға деген ұмтылысын көрсетеді.
2022 жылы «Stadler Rail AG» компаниясы директорлар кеңесінің төрағасы Петер Шпулердің Қазақстанға іс-сапары барысында «ҚТЖ» ҰК» АҚ компаниялар тобы мен «Stadler Rail AG» компаниясы арасында отандық вагон жасау зауыты базасында швейцариялық технология бойынша жолаушылар вагондарын жасауға келісім-шарттарға қол қойылды.
Бұл келісімдер 2021 жылғы 29 қарашада ҚР Президенті Қасым-Жомарт Тоқаевтың Швейцарияға ресми сапары барысында қол қойылған «Қазақстан темір жолы» ҰК» АҚ мен «Stadler Rail AG» компаниясы арасындағы Стратегиялық ынтымақтастық туралы келісімді іске асыру шеңберінде жасалған болатын.
«Stadler Rail AG» компаниясының жоспарында вагон шығаратын зауытты жаңғырту, қазақстандық алюминийді пайдалану және толық өндіріс циклін құру бар.
Stadler компаниясы 2030 жылға дейін «ҚТЖ» ҰК» АҚ тобына арналған 537 жолаушылар вагондарын жасауды ұйымдастыру үшін зауыттың өндірістік алаңдары мен жабдықтарын жаңғыртуда. Жобаның жалпы құны 2,3 миллиард еуроны құрайды.
«ҚТЖ» ҰК» АҚ мен Stadler компаниясы арасындағы ынтымақтастықтың нәтижесінде жолаушылар вагондары паркінің техникалық жағдайын айтарлықтай жақсартуға, жолаушылардың қауіпсіздігі мен жайлылығын арттыруға қол жеткізіледі деп күтілуде.